Polšča adkryvaje dva pierachody na miažy ź Biełaruśsiu, ale pakul ź vialikimi abmiežavańniami
Ministerctva ŭnutranych spraŭ i administracyi Polščy płanuje z 17 listapada adkryć dva pamiežnyja pierachody ź Biełaruśsiu: Babroŭniki — Bierastavica i Kuźnica — Bruzhi. Prajekt pa hetaj spravie byŭ apublikavany ŭ čaćvier na sajcie Uradavaha centra.
Pierachod u Bierastavicy. Fota: Yandex.maps
Zhodna z prajektam rasparadžeńnia 17 listapada 2025 h. budzie adnoŭleny pamiežny ruch na dvuch darožnych pamiežnych pierachodach, paviedamlaje Pap.pl.
Prajektam praduhledžvajecca, što ruch praz punkt propusku «Kuźnica-Bruzhi» budzie adkryty dla pasažyrskaha transpartu, za vyklučeńniem aŭtobusaŭ. Ruch praz punkt propusku «Bierastavica-Babroŭniki» — dla pasažyrskaha i hruzavoha transpartu, u tym liku i dla aŭtobusaŭ.
Ruch hruzavoha transpartu praz «Babroŭniki» budzie dazvoleny tolki dla transpartnych srodkaŭ, zarehistravanych u krainach ES, Jeŭrapiejskaj zony svabodnaha handlu, Jeŭrapiejskaj ekanamičnaj prastory i Šviejcaryi.
«Prajektavanyja dziejańni majuć na mecie adnaŭleńnie pieramiaščeńnia ludziej i tavaraŭ, što źjaŭlajecca adkazam na čakańni hramadskaha boku, u pryvatnaści vialikaj hrupy pradprymalnikaŭ, pieravozčykaŭ i asob, jakija jeździać na pracu ź Biełarusi ŭ Polšču», — čytajem u abhruntavańni prajekta. U miežach daroh dziaržaŭnaha značeńnia isnuje ŭsiaho šeść pamiežnych pierachodaŭ ź Biełaruśsiu.
Hatoŭnaść da adnaŭleńnia ruchu na dvuch pamiežnych pierachodach u Babroŭnikach i Kuźnicy Biełastockaj abiacaŭ u kastryčniku premjer Donald Tusk. Jon adznačyŭ tady, što adkryćcio adbudziecca na probu, paśla kansultacyj ź Litvoj.
Pierachod u Kuźnicy nie pracuje ź listapada 2021 h. Jaho zakryli, kali adbyłasia atak mihrantaŭ z boku Biełarusi. Pierachod u Babroŭnikach zakryli ŭ lutym 2023 h. paśla prysudu žurnalistu Andžeju Pačobutu.
Paśla hetaha na miažy Biełarusi i Polščy zastalisia pierachody «Brest-Tarespal» dla pasažyrskaha transpartu i aŭtobusaŭ i pierachod «Kazłovičy-Kukuryki» dla hruzavoha transpartu.
Litva zakryła miažu ź Biełaruśsiu da 30 listapada.