Mścisłaŭ Miekta: jašče adzin recydyvist rviecca va ŭładu, prykinuŭšysia śpiecnazaŭcam-jabaćkam
U koła najvyšejšaj biełaruskaj namienkłatury pralez čarhovy syn lejtenanta Šmita. U darepresijnyja časy fizijanomija Mścisłava Miekty nie złaziła z doški «Ich šukaje milicyja», a siońnia źziaje sa staronak BiełTA i «SB». Funkcyjanier ŁDPB, palityčny kamientatar, patryjot, vychavaciel, bieź piaci chvilin čynoŭnik, recydyvist. Vydajučy siabie za vieterana śpiecnaza, kryminalnik Miekta bratajecca z Karpiankovym. Majučy dzieviać kłasaŭ adukacyi, pastupaje na ideołaha ŭ mahistraturu Akademii kiravańnia. Raskazvajem pra čałavieka nieardynarnych talentaŭ, jaki vylez u ludzi z samaha dna.
Kali čynoŭnikaŭ i roznaha rodu aktyvistaŭ łukašyzmu prycisnuła raznaradkaj iści prapaviedavać u sacsietki, biełaruski siehmient fejsbuka, instahrama i tredsaŭ staŭ novym miescam dla vysłužvańnia.
Chor daŭnich krykunoŭ «za Łukašenku» razbavili i novyja hałasy, dla jakich vypiačvańnie svajoj łajalnaści — mahčymaść padniacca ŭ sistemie abo navat ulicca ŭ jaje.
Veb-udarnik Mścisłaŭ Miekta pradukuje bolš «patryjatyčnaha» kantentu, čym para ideałahičnych rajadździełaŭ. I pacichu prałazić u škoły, vajskovyja čaści i ŚMI. Fota: Facebook.com
Na adnaho z enierdžajzieraŭ apošniaj katehoryi i źviarnuła ŭvahu «Naša Niva». Mścisłaŭ Miekta hienieruje sotni «adabram-s» pastoŭ u miesiac na roznych płatformach: voś ja sa ściaham, voś ja z aŭtamatam, voś ja prykład dla školnikaŭ, voś ja čytaju dakład u Centrvybarkamie, voś ja zaklikaju biełarusaŭ «lubić radzimu i pavažać Prezidenta».
Nie budučy da taho ničym i nikomu viadomym, Miekta vykładvaje siabroŭskija fota z takimi ludźmi i ŭ takich abstavinach, u jakija zvyčajnamu čałavieku nie trapić: ministry, hienierały, pasły ŭschodnich despatyj, vučeńni śpiecnaza, forumy biaśpieki, «błatnyja» subotniki.
Pradstaŭlajecca Miekta ardenanosnym funkcyjanieram paŭličenkaŭskaj asacyjacyi vieteranaŭ śpiecnazu «Honar» («Čiesť»), členam Centralnaha kamiteta hajdukievickaj partyi ŁDPB i staršynioj jaje Savieckaj rajonnaj arhanizacyi pa Minsku, a taksama mahistrantam Akademii kiravańnia pa śpiecyjalnaści «dziaržaŭnaje kiravańnie i ideałohija».
Pryhožaje raźvitalnaje fota pasła Sie Siaojuna. Fota: Facebook.com
I ŭsio heta praŭda — u Miekty jość paśviedčańni i taho, i taho, i sapraŭdnaja studenckaja knižka taksama. Tolki jość i niuans.
Bieskampramisny «zakońnik» Mikałaj Karpiankoŭ mocna ciśnie ruku machlaru ŭ formie ŭnutranych vojskaŭ, jakimi sam ža Karpiankoŭ i kiruje. Fota: Facebook.com
Uzychodziačaja zorka prapahandy nikoli nie słužyła ŭ śpiecnazie, a źjaŭlajecca minimum trojčy sudzimym kryminalnikam z 9 kłasami adukacyi. Aficyjnyja padrabiaznaści jaho zachaplalnaj bijahrafii z bazaŭ danych «Našaj Nivie» padaŭ Belpol.
Mścisłaŭ Miekta ź ministram pryrodnych resursaŭ Siarhiejem Maślakom na «ministerskim» subotniku. Fota: Facebook.com
Z hrazi ŭ kniazi
Mścisłaŭ Miekta naradziŭsia ŭ Minsku ŭ 1985 hodzie ŭ siamji kiroŭcy i prybiralščycy. Skončyŭ dzieviać kłasaŭ škoły №67, adukacyju praciahvać nie staŭ, u vojsku nie słužyŭ. Miarkujučy pa źviestkach z bazy danych, ličyŭsia naminalnym dyrektaram u pryvatnych arhanizacyjach, jakija na hety momant likvidavanyja. Paźniej pajšoŭ pa kryminalnaj linii.
Mścisłaŭ Miekta ŭ maładości. Da 2020‑ch kantent jahonych sacsietak u asnoŭnym składali reposty z błatnych i pacanskich cytatnikaŭ. Fota: OK.ru
Pieršy raz Miektu sudzili ŭ 2007 hodzie pa č.1 i č.2 artykuła 209 (machlarstva i machlarstva paŭtorna) i č.1 artykuła 431 (dača chabaru). Prysud libieralny — dva z pałovaj hady chatniaj chimii.
Stanam na siaredzinu 2021 hoda ŭ bazie «Biełpoła» jość 39 zapisaŭ ab abmiežavańni vyjezdu ź Biełarusi, nakładzienych na Miektu.
Vyjezd abmiažoŭvajuć u vypadkach, kali čałaviek znachodzicca pad śledstvam, pad padpiskaj ab niavyjeździe, znachodzicca ŭ SIZA, u apieratyŭnaj raspracoŭcy, pad previentyŭnym nahladam, maje niaspłočanyja daŭhi i hetak dalej.
Dva razy Miektu abviaščali ŭ vyšuk. Padrabiaznaści hetych spraŭ my nie viedajem praź niapoŭnaść bazy.
Ale forumy aŭtamabilistaŭ pamiatajuć Miektu jak čałavieka, jaki ŭ 2015‑m hodzie «pradavaŭ» nieisnujučyja ruchaviki, bieručy pieradapłatu napierad, a potym śćviardžajučy, što ruchavik nibyta zachras na mytni. Hrošy Miekta nie viartaŭ, praz forum šukali inšych paciarpiełych dla napisańnia kalektyŭnaj zajavy ab machlarstvie.
Fota: drive2.ru
U 2019 hodzie Miekta atrymaŭ dva hady kałonii-pasialeńnia z zabaronaj na piać hadoŭ kiravać mašynaj. Historyja była hučnaja — biaspraŭnik na «Aŭdzi» imčaŭsia pa praśpiekcie Dziaržynskaha na chutkaści 137 km/h. Palot byŭ pierarvany bietonnym uvachodam u stancyju mietro «Hrušaŭka».
Jaho dziaŭčyna — i budučaja žonka — Anhielina Kazłova atrymała ciažkija cialesnyja paškodžańni, ale prasiła nie karać žanicha. Maŭlaŭ, spaźniałasia na maršrutku, tamu sama pryśpiešvała honščyka.
Avaryja Miekty. Fota: Onliner.by
Miekta prabyŭ za kratami niadoŭha. Adzin hod źjeła amnistyja, a tam prapanavali i ŭmoŭna-daterminovaje.
U kancy 2020‑ha Miektu znoŭ złavili za rulom i sudzili jašče raz. Abyšłosia vialikim štrafam, ale zabaronu na atrymańnie pravoŭ praciahnuli da lutaha 2025 hoda.
Ci prytrymlivaŭsia jon zabarony na kiravańnie? Dy nie, plavaŭ na zakon. Sa svajho telehram-akaŭnta Miekta aktyŭničaŭ u čatach miechanikaŭ, sprabujučy razabracca, čamu jaho mašyna kiepska jedzie.
Skrynšot vyhružanaha archiva paviedamleńniaŭ karystalnika @Mstyslau [id418239210]
Aproč kryminalnych pryhod, bijahrafija Miekty ŭjaŭlaje saboj ciomnuju plamu.
Napačatku 2020‑ch jon, imavierna, handlavaŭ usim zapar na rynku, tamu što jahony telefonny numar (heta my pravieryli praź śpiecyjalnyja servisy) padpisany ŭ inšych ludziej jak «Mścisłaŭ Miasa», «Sała Słava Zieł Łuh», «Słava Rynak», «Zapčastki Minsk», «Vykup hruzavika», «Praduktovaja krama».
Praduktovaja krama na Mieleža ŭ Minsku, jakuju rekłamavaŭ Miekta ŭ telehram-čatach. Fota: Vajbier
U 2021‑m hodzie Miekta zabivaŭ efir rekłamaj praduktovaj kramy ŭ rajonnych čatach Minska. Praŭda, inšyja ŭdzielniki čataŭ zaklikali zabanić spamiera, «tamu što ŭ hetaj kramie pierapradajucca tavary sa «Śviatłafora» z čatyrochrazovaj nacenkaj». Miekta kryŭdziŭsia i prapanoŭvaŭ addać pamiaškańnie razumnikam, kab jany tam adkryvali što chočuć, choć pamiaškańnie było nie jahonaje, a ŭ arendzie.
Čym jon jašče zajmaŭsia da 2023 hoda — daty, kali źjaviŭsia ŭ atačeńni Hajdukieviča-małodšaha — viadoma słaba. Takim čynam, daroha Miekty «va ŭładu» niezrazumiełaja, ale fakt u tym, što tramplinam dla prajdziśvieta stała ŁDPB.
Viasnoj 2023 hoda Mścisłaŭ zavioŭ čystyja sacyjalnyja staronki ŭ fejsbuku i instahramie.
Pieršaj publikacyjaj stała sełfi na fonie čyrvona-zialonaha ściaha, druhoj — łahatyp ŁDPB, treciaj — hrupavoje fota sa źjezda partyi.
Debiutnaje «palityčnaje» fota Miekty. Fota: Facebook
Jak adnapartyjec Hajdukieviča Miekta nabłatykaŭsia na VIP-mierapryjemstvach, kudy chadziŭ u kampanii načalnika.
Alaksandr Špakoŭski siamiejničaje z aktyvistami na niejkim z režymnych pryjomaŭ. Prynamsi dvoje na fota sudzimyja. Fota: Facebook.com
I ŭrešcie staŭ na pravierany i nadziejny patryjatyčny trek.
«Dzieci vajny». Mierapryjemstva ŭ babrujskim dziciačym łahiery «Arlania». Sudzimyja (abodva) aktyvisty ŁDPB vučać dziaciej histaryčnaj pamiaci. Fota: Facebook.com
Miekta nie prapuskaŭ nivodnaj pamiatnaj daty, upliščvaŭsia ŭ delehacyi pa ŭskładańni kvietak i pieraniaŭ estetyku — zusim jak darosły jabaćka načapiŭ na łackan značak z čyrvona-zialonym ściaham (raniej takija dazvalali nasić tolki funkcyjanieram abo deputatam ź sienatarami).
Mścisłaŭ Miekta ŭ składzie delehacyi treciaha ešałona ŭłady, pieršy źleva, u adnym šerahu z Volhaj Čamadanavaj. Fota: Skrynšot Youtube
Mścisłaŭ na chadu navučaŭsia kancylarskamu rehistru i ŭrešcie pačaŭ afarmlać im svaje dopisy, kštałtu: «U ramkach fiestyvala «Śviata lonu» 28‑29 červienia ŭ Minsku ŭ Vierchnim horadzie prachodziać pakazy mod, pryśviečanyja lnianoj tematycy. Mierapryjemstva zaklikana papularyzavać nacyjanalnyja tradycyi i demanstravać pierśpiektyvy vykarystańnia lonu ŭ roznych śfierach, uklučajučy lohkuju pramysłovaść i mastackija promysły […]»
Spraŭlajecca Miekta jaŭna nie biez čužoj dapamohi, bo jaho ŭłasnyja paviedamleńni ŭ telehram-čatach strakaciać hramatyčnymi i łahičnymi pamyłkami.
Recydyvist Miekta pa ŭsioj bačnaści «prafiłaktuje» niejkaha hramadzianina razam ź milicyjaj u składzie kamisii pa biespracoŭi. Fota: Facebook.com
Za hod plonnaha netvorkinhu Miekta znajšoŭ sabie novaha patrona — sumnaviadomaha Dźmitryja Paŭličenku, eks-načalnika v/č 3214, z čyim imiem źviazvajuć zabojstvy apanientaŭ Łukašenki ŭ 90‑ch — 2000-ch.
Paŭličenka pryniaŭ Miektu ŭ šerahi vieteranskaj arhanizacyi śpiecnazaŭcaŭ «Honar» («Čiesť»).
Mścisłaŭ Miekta i Dźmitryj Paŭličenka, adno z mnohich sumiesnych fota. Fota: Facebook.com
Z hetaha momantu Miekta abharnuŭsia kicielem śpiecnazaŭca ŭnutranych vojskaŭ i ŭ novym ampłua ŭziaŭ pazyŭny — «Deputat».
Jak bajec «Deputat» hety syn lejtenanta Šmita staŭ udzielničać u zborach vajskoŭcaŭ zapasu ŭnutranych vojskaŭ i atrymaŭ u ruki zbroju, što ŭ situacyi Miekty supiarečyć nie tolki zdarovamu sensu, ale i biełaruskamu zakanadaŭstvu.
Sudzimy Miekta, jaki nikoli nie słužyŭ u vojsku, u bardova-biełaj cialniašcy i ŭ kiepcy ŭnutranych vojskaŭ na zborach dla vieteranaŭ. Fota: Facebook.coom
Vytrymka z zakona «Ab vajskovym abaviazku i vajskovaj słužbie», artykuł 31:
«Pryzyvu na terminovuju vajskovuju słužbu, vajskovuju słužbu aficeraŭ pa pryzyvie, słužbu ŭ reziervie nie padlahajuć hramadzianie:
— jakija adbyli pakarańnie ŭ vyhladzie pazbaŭleńnia voli ŭ papraŭčych ustanovach; […]».
Ale ŭ krainie nie da zakonaŭ, i recydyvist navat atrymaŭ hramatu ad načalnika čaści 3214, pałkoŭnika Dźmitryja Mikšy.
Paŭličenka vypisaŭ vydatniku miedal «80 hod vyzvaleńnia Biełarusi ad niamiecka-fašysckich zachopnikaŭ».
Paralelna z hetym Miekta staŭ davieranaj asobaj Hajdukieviča-małodšaha na prezidenckich vybarach 2025 hoda, a taksama staršynioj kaardynacyjnaj rady ŁDBP pa Savieckim rajonie Minska.
I akazaŭsia ekśpiertam-kamientataram dla «SB» i BiełTA pa pytańniach vykanańnia zakonnaści na vybarach.
«Za čas daterminovaha hałasavańnia našymi naziralnikami nie zafiksavana nijakich parušeńniaŭ», — zapeŭnivaŭ recydyvist sa staronak BiełTA.
Uźlot u palityčnyja kamientatary i funkcyjaniery ŁDPB paŭpłyvaŭ i na «vajskovuju» karjeru ašukanca.
U červieni 2025 hoda Miekta pavysiŭ siabie da małodšaha siaržanta i prylapiŭ na pravy bok hrudziej znak «Za samaaddanuju słužbu» II stupieni.
Małodšy siaržant zapasu ŭnutranych vojskaŭ Mścisłaŭ Miekta letam 2025-ha. Admietnaści fota dadaje fakt, što nahrudny značok «Za samaaddanuju słužbu II stupieni» jon moh atrymać tolki z ruk Karpiankova, bo taki zakon. A moh nalapić i sam. Takija niadoraha pradajucca na barachołkach. Fota: Facebook.com
Vytrymka z pałažeńnia ab nahrudnym značku ŭnutranych vojskaŭ MUS «Za samaaddanuju słužbu»:
1) […] uznaharodžvajucca vajskoŭcy ŭnutranych vojskaŭ MUS za:
— śmiełaść i rašučaść, vysoki prafiesijanalizm pry vykanańni zadač, uskładzienych na ŭnutranyja vojski, u tym liku pry zabieśpiačeńni pravavych režymaŭ kontrterarystyčnaj apieracyi, nadzvyčajnym i vajennym stanoviščy;
— racyjanalizatarskija prapanovy i ŭkaranieńnie asabliva kaštoŭnych vynachodnictvaŭ u dziejnaści ŭnutranych vojskaŭ;
— vysokija pakazčyki ŭ bajavoj (prafiesijnaj) padrychtoŭcy i vajskovaj (słužbovaj) dyscyplinie;
— vysokija vyniki ŭ padrychtoŭcy kvalifikavanych kadraŭ unutranych vojskaŭ i orhanaŭ unutranych spraŭ.
[…] Paradak pradstaŭleńnia da ŭznaharodžvańnia nahrudnym znakam II stupieni vyznačajecca namieśnikam ministra ŭnutranych spraŭ — kamandujučym unutranymi vojskami.
[…] uznaharodžvańnie nahrudnym znakam II stupieni robicca zahadam kamandujučaha ŭnutranymi vojskami.
[…] nahrudny znak i paśviedčańnie da jaho ŭručajucca kamandujučym unutranymi vojskami abo inšymi asobami pa jaho daručeńni asabista ŭhanaravanamu va ŭračystaj abstanoŭcy.
I karjera Mścisłava tolki razhaniajecca.
Vosieńniu 2025 hoda Miekta staŭ słuchačom paŭtarahadovych kursaŭ pierapadrychtoŭki kiraŭničych kadraŭ u Akademii kiravańnia pa śpiecyjalnaści «Dziaržaŭnaje kiravańnie i ideałohija».
Mścisłaŭ chodzić na pary jak na rabotu ŭ vykankam — pry pinžaku i halštuku. Fota: Facebook.com
Jak jamu heta ŭdałosia — jašče adna zahadka. Dziakujučy Belpol my majem apošni kryminalny prysud, vyniesieny Miektu ŭ pačatku 2021 hoda. Tam u daviedačnaj infarmacyi pra abvinavačanaha skazana, što jaho adukacyja — bazavaja (9 kłasaŭ).
Dla pierapadrychtoŭki treba być bakałaŭram — u śniežni 2024‑ha Miekta chvaliŭsia zakančeńniem dystancyjnaha adździaleńnia Horackaj sielskahaspadarčaj akademii. Pavodle biełaruskaha zakanadaŭstva, čałaviek z bazavaj adukacyjaj va ŭniviersitet pastupić nie moža — patrabujecca siaredniaja abo siarednie-śpiecyjalnaja, ale atrymańnie siarednie-śpiecyjalnaj paśla bazavaj zajmaje try hady.
Takim čynam, Miekta z 2021 hoda nievytłumačalnym sposabam skaraciŭ svaju akademičnuju darohu i jašče praz hod u teoryi zmoža atrymać pryznačeńnie ŭ dziaržaŭnyja struktury.
Apošniaje, čym pachvaliŭsia naš hieroj u sacyjalnych sietkach — heta naviedvańnie bazy AMAPa i ŭstupleńnie ŭ hramadskaje abjadnańnie «Čornyja bierety». Ciapier jon jašče i vieteran AMAPa.
Chto viedaje, kudy spryjalnyja časy zaniasuć hetaha biezumoŭna adoranaha prajdziśvieta ŭ budučyni.
Historyja adnaho ź jaho papiarednikaŭ, inšaha syna lejtenanta Šmita — Siarhieja Zasłaŭskaha-Aŭtuchoviča, — skončyłasia sumna. Jaho adpravili na prymusovaje psichijatryčnaje lačeńnie.
Čytajcie taksama:
Jabaćka lejtenanta Šmita. Šmatrazova sudzimy recydyvist vydaŭ siabie za vieterana śpiecnaza i daros da ministerskaha ŭzroŭniu RASŚLEDAVAŃNIE
«Jabaćka lejtenanta Šmita», jaki vadziŭ za nos milicyju i Saŭmin, trapiŭ u SIZA
Etałonnaha jabaćku pryznali nieadekvatnym i źbirajucca lačyć
{DONATE_PAYPAL}