Kataliki-trampisty ŭźjelisia na pieršaha amierykanskaha Papu: Leŭ XIV praciahvaje leva-prahresiŭnuju palityku Franciška
Prychilniki ruchu MAGA spadziavalisia, što dziela viartańnia bahatych pravych donaraŭ, jakich adšturchnuŭ Francišak, Leŭ XIV budzie maŭčać pra mihrantaŭ i kapitalizm. Adnak jon praciahvaje liniju svajho papiarednika i adkryta havoryć pra biednaść, niaroŭnaść i źmianieńnie klimatu.
Papa Leŭ XIV. Fota: AP Photo/Andrew Medichini
Pra heta piša brytanskaje vydańnie The Economist.
25 kastryčnika amierykanski kardynał Rejmand Biork adsłužyŭ u Vatykanie ŭ bazilicy Śviatoha Piatra ŭračystuju imšu ŭ łacinskim abradzie. Jašče hod tamu takoje vidovišča było b niemahčymym: Papa Francišak, jaki pamior u krasaviku, stroha abmiažoŭvaŭ praviadzieńnie imšy na łacinskaj movie. Kardynał Biork, jaki ŭznačaliŭ tradycyjanaliscki bunt suprać libieralnych reformaŭ Franciška, byŭ pazbaŭleny ŭsich značnych pasad.
Dla niekatorych kansiervatyŭnych katalikoŭ, jakija z 1960‑ch hadoŭ nastojliva prasoŭvajuć viartańnie łacinskaj imšy, heta stała pieramohaj. Ale inšyja ŭbačyli ŭ hetym tolki sprobu ich supakoić.
Papa Leŭ XIV, jaki dazvoliŭ praviadzieńnie hetaj imšy, vyhladaje zadavolenym tym, što kadziła ŭznosicca ŭharu, pakul jon praciahvaje liniju Franciška ŭ pytańniach biednaści, niaroŭnaści i źmianieńnia klimatu.
Jaho pieršy važny tekst, «Dilexi te» — pra kłopat ad klimacie, pryjom mihrantaŭ i imknieńnie da ekanamičnaj spraviadlivaści jak pra śviaščenny abaviazak. Dla prychilnikaŭ jon — spahadlivy refarmatar; dla krytykaŭ — «kamunist» abo «woke-Papa».
Biendžamin Charnueł, karespandent MAGA-padkasta «WarRoom», skazaŭ, što tradycyjanalistaŭ «padkupili». Amierykanskija kansiervatyŭnyja kataliki, mnohija ź jakich hałasavali za Donalda Trampa, spadziavalisia na papu, jaki budzie maŭčać pra mihrantaŭ i kapitalizm, i zdoleje viarnuć bahatych pravych donaraŭ, jakich adšturchnuŭ Francišak.
Adnak zamiest hetaha Leŭ asudziŭ «nialudskuju» palityku departacyj u ZŠA. Na sustrečy z amierykanskimi biskupami ŭ kastryčniku jon zaklikaŭ ich vystupać z adkrytaj pazicyjaj u hetych pytańniach. Nieŭzabavie paśla taho, jak spadar Tramp nazvaŭ źmianieńnie klimatu «machlarstvam», Papa papraknuŭ lidaraŭ, jakija «naśmichajucca z hłabalnaha paciapleńnia», i błahasłaviŭ kavałak lodu z Hrenłandyi. Kansiervatary nazvali hety žest pahanskim.
Najbolš rezkaja reakcyja prahučała paśla taho, jak Leŭ zajaviŭ, što prychilniki śmiarotnaha pakarańnia nie mohuć nazyvać siabie pra-łajf. Biskup z Techasa Džozef Strykłand napisaŭ u adkrytym liście, što «Kaścioł, jaki ja lublu, razburajecca». Džon Jep, kiraŭnik arhanizacyi «Catholics for Catholics», adznačyŭ, što tradycyjanalisty ŭdziačnyja Lvu za dazvoł imšy, ale jaho pazicyja ŭ dačynieńni mihrantaŭ śviedčyć, što jon «nie razumieje, što adbyvajecca» ŭ Amierycy.
Dzie Francišak časta dziejničaŭ rezka, Leŭ dziejničaje pavolna i aściarožna. «Leŭ bolš razumny, bolš tonki, čym Francišak, i tamu bolš niebiaśpiečny», — kaža Charnueł.
Choć novy Papa padtrymlivaje bolšy ŭdzieł śvieckich ludziej i žančyn u palitycy i vučeńni, jon, vierahodna, rasčaruje prahresistaŭ u pytańniach abortaŭ i hiendaraŭ. Tym nie mienš, u cełym, Vatykan pry Lvie vyrazna schilajecca ŭleva. Kansiervatary atrymali svaju imšu, ale nie svajho čałavieka.