Daterminova prybrali ź sienataraŭ byłoha dyrektara Hrodzienskaha miasakambinata
U kancy kastryčnika Aleha Ivanova zvolnili i z pasady dyrektara pradpryjemstva.
Aleh Ivanoŭ. Fota: grodnolen.gov.by
Saviet Respubliki daterminova spyniŭ paŭnamoctvy člena SR vośmaha sklikańnia Aleha Ivanova. Dakumient siońnia zarehistravany ŭ Nacyjanalnym rejestry pravavych aktaŭ. Jon jašče nie apublikavany, tamu matyvacyja pakul nieviadomaja, zaŭvažyŭ Refrom.news.
Aleh Ivanoŭ byŭ hienieralnym dyrektaram AAT «Hrodzienski miasakambinat» da kanca kastryčnika 2025 hoda. Krychu bolš za tydzień tamu stała viadoma, što pradpryjemstva ŭznačaliła Volha Januška, jakaja da hetaha pracavała hienieralnym dyrektaram AAT «Vaŭkavyski miasakambinat».
U vieraśni-kastryčniku MUS i KDK dvojčy paviedamlali pra zatrymańni na miasakambinatach u suviazi z karupcyjnymi złačynstvami. U abodvuch vypadkach pra pośpiechi paviedamlali padraździaleńni pa Minskaj vobłaści. Mahčyma, sprava pajšła dalej.
Aleh Ivanoŭ staŭ šyroka viadomym na postsavieckaj prastory, dziakujučy artykułu na kanale «Hrodna Plus».
U materyjale Ivanoŭ adkazvaŭ na pytańnie ab sakretnym inhredyjencie kaŭbasy. «Usio pytańnie ŭ ludziach i ich adkaznaści da toj spravy, jakoj jany vyrašyli zajmacca na roznych etapach. Tamu što ludzi Hrodna, Hrodzienščyny — pracavityja, pracazdolnyja, jany chočuć pry vytvorčaści zrabić tak, kab heta było jakasna», — adkazaŭ Ivanoŭ.
Rezanansny materyjał vyjšaŭ pad zahałoŭkam «Sakretny inhredyjent najlepšaj kaŭbasy — ludzi».