Pryščepka ad COVID-19 dapamahaje ŭ baraćbie z rakam — daśledavańnie
Vakcyny ad karanavirusu nie tolki abaraniajuć ad ciažkaha ciačeńnia chvaroby, ale i dapamahajuć arhanizmu bolš efiektyŭna zmahacca z ankałahičnymi zachvorvańniami.
AP Photo / Rogelio V. Solis
Da takoj vysnovy pryjšli daśledčyki z amierykanskaha centra MD Anderson u Chjustanie, piša časopis Nature. Navukoŭcy praanalizavali danyja bolš jak tysiačy pacyjentaŭ, jakija prachodzili lačeńnie pamiž 2019 i 2023 hadami.
U chvorych, jakija atrymali mRNK-vakcynu na praciahu 100 dzion paśla pačatku imunaterapii, trochhadovaja vyžyvalnaść akazałasia ŭdvaja vyšejšaja, čym u niepryščeplenych. Asabliva mocny efiekt naziraŭsia ŭ pacyjentaŭ z tak zvanymi «chałodnymi» puchlinami — naprykład, pry raku pradstalovaj załozy i padstraŭnikavaj załozy, dzie imunnaja sistema zvyčajna reahuje słaba. U ich vakcyna pavialičvała šancy na vyžyvańnie ŭ piać razoŭ.
Jak tłumačać aŭtary daśledavańnia, mRNK-vakcyny dziejničajuć jak sihnał tryvohi dla imunnaj sistemy: jany aktyvujuć achoŭnyja kletki, jakija pačynajuć raspaznavać i źniščać rakavyja kletki. Pry hetym tradycyjnyja vakcyny takoha efiektu nie davali.
Ciapier daśledčyki płanujuć bujnoje kliničnaje vyprabavańnie, kab paćvierdzić, ci moža mRNK-vakcynacyja stać častkaj standartnaj terapii dla ankałahičnych pacyjentaŭ.
«Efiekt, apisany ŭ daśledavańni, uražvaje, ale nie ździŭlaje. Lubyja vakcyny stymulujuć imunitet, a mRNK-čaścicy, zdajecca, robiać heta asabliva efiektyŭna», — adznačyŭ niamiecki imunołah Karsten Vacl u razmovie z Bild.