U MZS zajavili, što Litva zakryła miažu ź Biełaruśsiu, bo choča hrošaj ad ES

Pres-sakratar MZS Biełarusi Rusłan Varankoŭ zajaviŭ, što Litva śviadoma ŭzmacniaje napružańnie na miažy ź Biełaruśsiu, kab atrymać finansavańnie ź biudžetu Jeŭrasajuza.

Pa słovach Varankova, ciapierašniaja situacyja vyhladaje jak «dežaviu» — bo padobnaja situacyja, maŭlaŭ, užo nazirałasia raniej, kali paśla zajaŭ pra kryzisnuju situacyju na polska-biełaruskaj miažy Polšča atrymała bolš za 43 miljardy jeŭra na abaronnyja patreby. Ciapier nibyta i Litva pajšła toj ža darohaj.

Pradstaŭnik MZS miarkuje, što litoŭskija palityki spadziajucca atrymać «svoj finansavy kuš» ad ES, vykarystoŭvajučy temu mihracyi i kantrabandy jak padstavu dla pavyšeńnia napružanaści. Varankoŭ zajaviŭ, što prablema kantrabandy, maŭlaŭ, isnuje na mnohich miežach śvietu, ale navat hienieralny prakuror Litvy paźbiahaje farmulovak pra «hibrydnuju ataku» z boku Biełarusi — bo nibyta niama dokazaŭ.

Taksama čynoŭnik panarakaŭ, što zakryćcio litoŭskich punktaŭ propusku śviedčyć, maŭlaŭ, pra sapraŭdnaje staŭleńnie da jeŭrapiejskich kaštoŭnaściaŭ, u tym liku svabody pieramiaščeńnia. A padtrymka hetych dziejańniaŭ z boku Jeŭrapiejskaj słužby źniešnich dziejańniaŭ biełaruski režym uvohule zasmučaje.

Kamientary da artykuła