Učora na terytoryju Litvy zalacieła 66 mieteazondaŭ
Kiraŭnik Nacyjanalnaha centra kiravańnia kryzisami Viłmantas Vitkaŭskas zajaviŭ, što viečaram u niadzielu ź Biełarusi ŭ bok Litvy było zapuščana bolš pavietranych mieteazondaŭ z kantrabandnymi cyharetami, čym dniom raniej, paviedamlaje LRT.
Ilustracyjnaje fota
Pa jaho słovach, na radarach, što adsočvajuć pavietranuju prastoru Litvy, byli zafiksavanyja 66 abjektaŭ.
«Zafiksavana 66 štuk. U paraŭnańni z pazaŭčarašnim dniom — heta pryblizna ŭdvaja bolš», — skazaŭ Vitkaŭskas u efiry Radyjo LRT.
Jon udakładniŭ, što pakul znojdzieny tolki adzin šar, jaki zalacieŭ na terytoryju Litvy, astatnija praciahvajuć šukać.
Z-za incydentu znoŭ časova była prypynienaja rabota Vilenskaha aeraporta, a Litva na niekatory čas zakryła naziemnyja pamiežnyja punkty ź Biełaruśsiu. Pradstaŭniki słužbaŭ adznačajuć, što zapusk kantrabandnych pavietranych šaroŭ aktyvizujecca pry spryjalnych dla parušalnikaŭ umovach nadvorja — najpierš pry adpaviednym kirunku vietru.
«Kali my bačym, što šary ruchajucca ŭ bok aeraporta, u kirunku ŭźlotna-pasadačnaj pałasy abo, skažam, prosta ŭ toj bok — tady prymajucca adpaviednyja rašeńni (ab prypynieńni pracy aeraportaŭ)», — patłumačyŭ Vitkaŭskas.
Z-za pralotaŭ pavietranych šaroŭ praca aeraportaŭ u Litvie parušajecca ŭžo trecija sutki zapar; u adzin ź dzion zboi zakranuli i Kovienski aeraport.
U paniadziełak uradavaja Kamisija nacyjanalnaj biaśpieki źbiarecca, kab abmierkavać situacyju.
U niadzielu ministr unutranych spraŭ Uładzisłaŭ Kandratovič paśla sustrečy z kiraŭnikami armii i viedamstvaŭ unutranych słužbaŭ zajaviŭ, što struktury nieadkładna prymuć novyja miery dla papiaredžańnia pahroz, źviazanych z zapuskam kantrabandnych šaroŭ ź Biełarusi, adnak nie staŭ raskryvać ich źmiest ź mierkavańniaŭ biaśpieki.