U Homieli baćki ŭsio čaściej dajuć dzieciam dva imieni
Sioleta na Homielščynie zarehistravali chłopčykaŭ ź imionami Tea-Łuiz, Biłał-Amir, Andžej-Łukaš. Śpis aryhinalnych žanočych imionaŭ papoŭnili Maryja-Mišel, Hanna-Maryja, Palina-Leja, Amina-Albertyja, Eoła-Eryka.
Ilustracyjnaje fota
Valeryja, maci maleńkaj Paliny-Lei, pieršapačatkova maryła nazvać dačku Łarelejaj, paviedamlaje ŭpraŭleńnie justycyi Homielskaha abłvykankama.
«Hetaje imia suhučnaje z maim imiem i imiem babuli Łory. Ale my padumali, što Łareleja — imia składanaje, i vyrašyli pakinuć tolki jaho častku, nazvaŭšy małuju Lejaj. Tak my i źviartalisia da jaje ŭsiu ciažarnaść», — dzielicca Valeryja.
Adnak bližej da rodaŭ siamja zadumałasia nad imiem Palina. Poŭnaściu admaŭlacca ad Lei baćki nie zachacieli. Kampramisam stała dvajnoje imia Palina-Leja.
«Zaraz muž čaściej nazyvaje dačku Palinaj abo Poli, a ja — Lejaj. Svajaki ŭspryniali naša rašeńnie z ździŭleńniem i nazyvajuć dziaŭčynku tym imiem, jakoje im bolš pa dušy», — z uśmieškaj raskazvaje mama.
Žycharka Homiela Iryna i jaje muž, hramadzianin Turcyi, vybrali dla syna imia Tea-Łuiz. U im spałučylisia siamiejnyja tradycyi i luboŭ muža da futboła
Pa słovach Iryny, muž prapanoŭvaŭ nazvać syna Łuiz u honar znakamitaha futbalista. U hetym vidzie sportu jon bačyć i budučyniu syna.
Proźvišča futbalista nie ŭdakładniajecca, ale, mahčyma, nazvali ŭ honar byłoj zorki PSŽ, «Arsienała» i «Čełsi» brazilca Davida Łuisa, jaki zaraz hulaje za kiprski «Pafas». Kaliści źziaŭ u Jeŭropie znakamity «zubaścik», najlepšy bambardzir zbornaj Uruhvaja Łuis Suares, jaki zaraz haniaje za «Inter Majami». Jość ispaniec Łuis Pieres, jaki hulaje ŭ hetym siezonie za turecki «Hazijantep».
Druhaja častka imia — Tea — źjaviłasia jak skaračeńnie ad tureckaha imia Teaman. Dvajnoje imia Tea-Łuiz adrazu spadabałasia svajakam-zamiežnikam. Niestandartny vybar u vyniku padtrymali i baćki Iryny.
«Spačatku hetaje imia zdavałasia biełaruskim babuli i dziaduli niazvykłym, navat błytalisia, — pryznajecca maładaja mama. — Zaraz jany ŭžo nie zabyvajuć, jak zavuć unuka. Adnak u paŭsiadzionnym žyćci nazyvajuć jaho karotka i łaskava — Tea».