U Charkavie rasijanie trapili ŭ pryvatny dziciačy sadok
U Charkavie rasijskaja armija trapiła ŭ pryvatny dziciačy sadok, jość paranienyja i zahinuły. Try vybuchi prahučali ŭ horadzie 22 kastryčnika, pieršy čuli a 10:52. Da hetaha Pavietranyja siły papiaredžvali pra toje, što ŭ kirunku Charkava laciać udarnyja bieśpiłotniki, piša «Suśpilnie».
Usich dziaciej ź dziciačaha sadka evakujavali, paviedamiŭ haradski kiraŭnik Ihar Cierachaŭ.
U Charkavie ŭ vyniku rasijskaj ataki dvoje mužčyn i čaćviora žančyn atrymali vybuchovyja traŭmy i ŭdary, paviedamiŭ kiraŭnik AVA Aleh Siniahubaŭ.
Paźniej stała viadoma, što 40‑hadovy mužčyna zahinuŭ. Ahułam kolkaść paranienych — dzieviać čałaviek.
Dziaciej z pryvatnaha sadka, u jaki trapiŭ dron, evakujavali, raskazaŭ haradski kiraŭnik Ihar Cierachaŭ. Pavodle jaho słoŭ, va ŭstanovie źniščany druhi pavierch, pažar i vyratavalnaja apieracyja praciahvajucca.
Cierachaŭ adznačyŭ, što siarod paranienych — kamunalniki, jakija pracavali pobač. Adzin čałaviek zahinuŭ.
Siońnia ŭpieršyniu dla ŭdaru pa Charkavie Rasija mahła vykarystać «šachied» z reaktyŭnym ruchavikom, paviedamiŭ kiraŭnik abłprakuratury Amił Amaraŭ. Pavodle jaho słoŭ, dziaciej svoječasova pieraviali va ŭkryćcio.
Pa słovach haradskoha kiraŭnika Ihara Cierachava, u dziciačy sadok było pramoje traplańnie. U hety čas va ŭstanovie znachodzilisia 48 dziaciej i vychavalnikaŭ. Paškodžańni atrymali šeść žyłych damoŭ pobač. Zahinuły — rabotnik kamunalnaj ustanovy, jon znachodziŭsia kala budynka: kamunalniki vyvozili śmiećcie i apałaje liście.
Na ataku na dziciačy sadok adreahavaŭ i Uładzimir Zialenski.
«Udar rasijskaha bieśpiłotnika pa dziciačym sadku ŭ Charkavie — paśla nočy masiravanaj ataki. Na žal, viadoma pra adnaho zahinułaha. Maje spačuvańni rodnym. Pa stanie na ciapier siem čałaviek paciarpieli. Im akazvajecca miedycynskaja dapamoha. Usie dzieci evakujavany i znachodziacca va ŭkryćciach. Pavodle papiaredniaj infarmacyi, u mnohich vostraja reakcyja na stres», — napisaŭ Zialenski.
Niama i nie moža być nijakaha apraŭdańnia ŭdaru dronam pa dziciačym sadku. Vidavočna, što Rasija stanovicca bolš nachabnaj. Hetyja ŭdary — heta plavok Rasii ŭ tvar kožnamu, chto nastojvaje na mirnym vyrašeńni.