Ministr zamiežnych spraŭ Vienhryi nazvaŭ fejkam naviny pra admienu sustrečy Trampa i Pucina ŭ Budapiešcie
Pra heta Pieter Sijarta napisaŭ u svaim tvitary.
Sustreča na Alascy 15 žniŭnia 2025 hoda. Fota: Jae C. Hong / AP
«Z taho momantu, jak było abvieščana pra mirny samit u Budapiešcie, było vidavočna, što mnohija zrobiać usio mahčymaje, kab hetaha nie adbyłosia. Pravajskovaja palityčnaja elita i ich ŚMI zaŭsiody pavodziać siabie padobnym čynam pierad padziejami, jakija mohuć akazacca vyrašalnymi pamiž vajnoj i miram», — napisaŭ ministr zamiežnych spraŭ Vienhryi.
Jon adznačyŭ, što adna i taja ž historyja paŭtarajecca amal pierad kožnym pasiadžeńniem Jeŭrapiejskaj rady, abo pierad pryniaćciem rašeńniaŭ pra sankcyi.
«Pakul samit sapraŭdy nie adbudziecca, čakajcie chvali ŭciečak, fejkavych navin i zajaŭ pra toje, što hetaha nie adbudziecca», — dadaŭ jon.
Nahadajem, što na minułym tydni padčas telefonnaj razmovy Donalda Trampa i Uładzimira Pucina stała viadoma pra mahčymuju budučuju sustreču prezidentaŭ u Budapiešcie (pieršaja adbyłasia 15 žniŭnia na Alascy). Potym Tramp skazaŭ, što sustreča ŭ stalicy Vienhryi moža adbycca ciaham dvuch tydniaŭ.
Učora było zajaŭlena, što jaje padrychtoŭka prypyniena.