Na MKAD małady kiroŭca ŭrezaŭsia ŭ słup, paciarpieła dziaŭčyna. A skončyłasia ŭsio viasiellem
U noč na subotu, 13 vieraśnia, kala 00:50, u rajonie 42‑ha km MKAD zdaryłasia surjoznaja avaryja. Aŭtamabil Saab vyjechaŭ za miežy prajeznaj častki i ŭrezaŭsia ŭ lichtar.
Mašynaj kiravaŭ 20‑hadovy chłopiec, jon nie spraviŭsia z kiravańniem. Paciarpieła jaho 21‑hadovaja pasažyrka, dziaŭčynu dastavili ŭ balnicu.
Paśla publikacyi z Onliner źviazaŭsia čytač, jaki śćviardžaje, što kiravaŭ hetym Saab.
— Mašynu paviało ŭprava — i ŭsio, — rastłumačyŭ jon. — Ale ŭsio dobra, usie žyvyja, na dziva, usie cełyja i amal zdarovyja.
Surazmoŭnik paprasiŭ pieradać słovy jaho padziaki tym, chto dapamahaŭ jamu i jaho pasažyrcy paśla zdareńnia.
— Ad usiaho serca chacieŭ by skazać vielizarny dziakuj ekipažu DAI №896: chłopcy pabiehli na dapamohu z druhoha boku MKAD u pieršyja 30 siekund paśla avaryi.
Dziakuj kiroŭcu žoŭtaha aŭtobusa MAZ, jaki spyniŭsia i adrazu pačaŭ dapamahać dastavać pasažyrku. Dziakuj doktaru-chirurhu BCHMP, jaki prajazdžaŭ mima i zrabiŭ usie dziejańni, jakija byli patrebnyja padčas čakańnia chutkaj dapamohi. Dziakuj ekipažu chutkaj i rabotnikam MNS. Vialiki dziakuj im usim: kali b nie hetyja ludzi, usio mahło b zakončycca značna horš, — adznačyŭ čytač.
I voś — zusim niečakany praciah hetaj historyi. Jak raskazali, kiroŭca i jaho pasažyrka — Ivan i Anhielina — da zdareńnia padavali zajavu ŭ ZAHS. Padpisańnie było pryznačana na 17 kastryčnika.
I voś zdaryłasia DTZ na MKAD. Ci pieraškodziła jano pary? Nie.
— Supracoŭniki ZAHSa — i vialiki im dziakuj za heta — arhanizavali vyjaznuju praceduru ŭ balnicy, — raskazali ŭdzielniki cyrymonii.