Telefonnyja machlary prosiać pieradavać hrošy z kiroŭcami mižnarodnych aŭtobusaŭ
Pracuje schiema nastupnym čynam.
Supracoŭniki minskaha kryminalnaha vyšuku spynili machlarstva i viarnuli amal 30 tysiač rubloŭ u roznaj valucie 28‑hadovamu žycharu Baranavičaŭ, paviedamlaje telehram-kanał staličnaj milicyi.
Małady čałaviek dumaŭ, što pieradaje svaje hrošy ŭ Nacbank i takim čynam ratuje siabie ad kryminalnaj adkaznaści. Śpiecyjalna dla hetaha jon pryjechaŭ u Minsk i sustreŭsia z mužčynam-kurjeram.
Toj schavaŭ pakiet z najaŭnymi hrašyma ŭ skrynku i nakiravaŭsia na aŭtavakzał. Tam znajšoŭ kiroŭcu najbližejšaha aŭtobusa i paprasiŭ kiroŭcu advieźci pasyłku za miažu. Paśla hetaha sam pajechaŭ dadomu, a paźniej byŭ zatrymany apieratyŭnikami.
Minčuk patłumačyŭ milicyjanieram, što vykonvaŭ prośbu siabra svajho siabra. Jon dziejničaŭ pa ŭkazańniach, jakija prychodzili jamu ŭ miesiendžary, i nie zdahadvaŭsia, što ŭdzielničaje ŭ złačynstvie.
Apieratyŭnikam udałosia źviazacca z vadzicielem aŭtobusa da taho, jak toj pierasiok dziaržaŭnuju miažu. Mužčyna pieradaŭ hrošy pravaachoŭnikam, usia suma budzie viernuta paciarpiełamu.
U milicyi prosiać kiroŭcaŭ mižnarodnych aŭtobusaŭ być uvažlivymi i nie pieradavać pasyłki ź nieviadomym źmiestam. Asabliva, kali z vami raźličvajucca najaŭnymi ŭ zamiežnaj valucie. Kurjery machlaroŭ niasuć kryminalnuju adkaznaść naroŭni z arhanizatarami złačynnych schiem.