U Fłarydzie vyjavili snajpierskuju vyšku ź vidam na samalot Trampa
Sakretnaja słužba ZŠA vyjaviła snajpierskuju vyšku pablizu mižnarodnaha aeraporta Pałm-Bič, ź jakoj adkryvaŭsia pramy ahlad na miesca vychadu amierykanskaha prezidenta Donalda Trampa z samalota, paviedamlaje NBC News.
Skryn videa NBC News
Pres-sakratar Sakretnaj słužby Entani Huhlijełmi zajaviŭ, što Fiederalnaje biuro rasśledavańniaŭ zaraz pravodzić rasśledavańnie hetaha fakta.
«Sakretnaja słužba ZŠA ciesna supracoŭničaje z FBR i našymi partniorami z pravaachoŭnych orhanaŭ u akruzie Pałm-Bič. Padčas papiarednich padrychtoŭčych mierapryjemstvaŭ pa biaśpiecy pierad prybyćciom u Pałm-Bič, jakija ŭklučali vykarystańnie technałohij i kompleksnyja ahlady, našy kamandy vyjavili abjekty, što ŭjaŭlajuć cikavaść, pablizu mižnarodnaha aeraporta Pałm-Bič», — skazaŭ jon.
Jon dadaŭ, što «heta nie paŭpłyvała na jakija-niebudź pieramiaščeńni, i na miescy nie było nijakich asob, jakija byli b da hetaha datyčnyja».
Čynoŭnik, znajomy z chodam rasśledavańnia, skazaŭ, što miesca znachodki raźmieščana praz darohu ad aeraporta, dzie časta parkujucca pryvatnyja samaloty, u tym liku i pryvatny samalot Trampa.
Jon adznačyŭ, što samalot z Trampam zvyčajna nie parkujecca ŭ hetaj zonie, ale vykarystoŭvaŭ hetu zonu ŭ minułym i jakraz budzie tam stajać zaraz z-za budaŭničych rabot, što tam viaducca.
Za apošnija dva hady na Donalda Trampa byli zrobleny dva zamachi.
U Piensilvanii ŭ lipieni 2024 hoda padčas pieradvybarčaha mitynhu 20‑hadovy Tomas Kruks adkryŭ ahoń pa Trampu z dachu budynka. Kruks byŭ zabity ahientami Sakretnaj słužby.
U Fłarydzie ŭ vieraśni 2024 hoda 59‑hadovy Rajan Rut schavaŭsia ŭ chmyźniaku na holf-poli ŭ Uest-Pałm-Bič, kab zabić kandydata ŭ prezidenty. Jon byŭ svoječasova zaŭvažany i aryštavany.