U Minsku pastavili aŭtamat, jaki pšykaje parfumaj za 1000 rubloŭ
U Minsku pačali stavić aŭtamaty, jakija pyrskajuć na haradžan darahoj parfumaj. Niekalki ź ich paviesili ŭ HC Dana Mall.
Fota tut i dalej: Blizko.by
Blizko.by pravieryŭ, jak pracujuć pryłady.
Na sensarnym ekranie pakazvajucca fłakony parfumu roznych brendaŭ. Spačatku treba vybrać, što vy chočacie na siabie pyrsnuć, zatym apłacić adno raspyleńnie.
Da apłaty prymajucca i karty, i maniety. Kupiury aŭtamat nie biare i reštu nie vydaje. Paśla apłaty nieabchodna vyznačycca z tym, jakuju častku cieła vy chočacie papšykać.
Adzin pšyk kaštuje ad 2,7 da 3,8 rubla. U asartymiencie aŭtamata — darahija parfumiernyja brendy. Naprykład Kirke tiziana terenzi, Kilian black phantom, Jex nihilo fleur narcotiqu i inšyja.
Cana hetych parfumaŭ — ad 660 rubloŭ za 100 mł da 1000 za 50 mł.
Paśla vybaru patrebnaj parfumy i apłaty aparat padkazvaje, ź jakoha pa liku dazatara vyljecca žadanaja vadkaść. U aŭtamacie amal usio pa-rusku. Na anhlijskaj tut tolki nazvy brendaŭ parfumy i infarmacyja pra toje, ź jakoha dazatara vyljecca abrany vami vodar.
Ź minusaŭ — niama detalovaj infarmacyi pra vodar. Chacia b kab zrazumieć: mužčynski jon ci žanočy, sałodki ci nie vielmi.
I jašče niuans — choć vybrany žurnalistam «pšyk» kaštavaŭ 3,8 rubla, z karty ŭ jaho śpisali 4 rubli. Paśla aŭtamat paviedamiŭ, što hetyja 20 kapiejek možna jašče patracić — ale ž na hetuju sumu nielha ničoha kupić.