Za rostam vykarystańnia bieśpiłotnikaŭ Rasijaj va Ukrainie stajać kitajskija zavody

Kitaj rezka pavieličyŭ ekspart u Rasiju klučavych kampanientaŭ, nieabchodnych dla vytvorčaści bieśpiłotnikaŭ, jakija kirujucca pa optavałakonnym kabieli i nie ŭraźlivyja da sistem REB.

Słaniečniki, abvityja vałakonna-aptyčnymi kabielami. Vakolicy Słavianska, Danieckaja vobłaść, Ukraina. Fota: Alex Babenko / AP

Aficyjny Piekin śćviardžaje, što zachoŭvaje niejtralitet u kanflikcie, a kitajskija vytvorcy, na dolu jakich prypadaje 80% suśvietnaha rynku kamiercyjnych bieśpiłotnikaŭ, skaracili pramy ekspart hatovych dronaŭ u Rasiju.

Adnak aficyjnyja danyja kitajskaha handlu śviedčać, što Piekin dazvoliŭ rezka pavialičyć pastaŭki kampanientaŭ, jakija dazvalajuć rasijskim vytvorcam źbirać drony, što kirujucca praz optavałakonny kabiel. Ab hetym piša vydańnie The Washington Post, jakoje vyvučyła mytnyja źviestki, danyja ab pastaŭkach i zajavy kampanij.

Pavodle źviestak kitajskaj mytni, pastaŭki optavałakonnych kabielaŭ u Rasiju ŭ mai i červieni dasiahnuli rekordnych 190,4 i 208 tysiač kiłamietraŭ adpaviedna, a ŭ žniŭni adbyŭsia masavy skačok da amal 525 000 kiłamietraŭ. Dla paraŭnańnia, va Ukrainu ŭ žniŭni było pastaŭlena ŭsiaho kala 115 kiłamietraŭ kabielu.

Kitajski ekspart vałakonna-aptyčnych kabielaŭ u Rasiju i Ukrainu. Ličby ŭ milach. Infarhafika: The Washington Post

Adnačasova rezka vyras i ekspart lityj-ijonnych akumulataraŭ u Rasiju, dasiahnuŭšy rekordnych 54 miljonaŭ dołaraŭ u červieni i krychu źniziŭšysia da 47 miljonaŭ u žniŭni. Ekśpierty miarkujuć, što hetyja batarei, chutčej za ŭsio, vykarystoŭvalisia ŭ vytvorčaści bieśpiłotnikaŭ, pakolki ŭ Rasii amal nie vyrablajucca elektramabili ci inšaja elektronika, dzie jany mahli b spatrebicca. U toj ža čas pastaŭki va Ukrainu zastavalisia na ŭzroŭni 11—12 miljonaŭ dołaraŭ u miesiac.

Ekspart lityj-ijonnych akumulataraŭ u Rasiju i Ukrainu. Infahrafika: The Washington Post

Takija technałohii majuć značnyja nastupstvy na poli boju. Drony, što kirujucca pa kabieli, ustojlivyja da radyjopieraškod i zdolnyja dziejničać na adlehłaści da 20 kiłamietraŭ. Naprykład, miascovyja ŭłady ŭ Kramatorsku, što prykładna za 20 km ad linii frontu, paviedamili pra pieršuju ataku z vykarystańniem optavałakonnaha drona 5 kastryčnika. Rasija vykarystoŭvaje takija bieśpiłotniki dla źniščeńnia łahistyčnych šlachoŭ, kamandnych centraŭ i srodkaŭ REB pierad pačatkam naziemnych atak.

Niahledziačy na «bieźlimitnaje siabroŭstva» pamiž Uładzimiram Pucinym i Si Czińpinam, Piekin nie pasyłaŭ vajennaj techniki dla padtrymki Maskvy. Adnak analiz pakazaŭ, što kitajskija vytvorcy kamiercyjnych bieśpiłotnikaŭ adyhrali klučavuju rolu ŭ naroščvańni vytvorčaści rasijskich dronaŭ i ciapier dapamahajuć raspracoŭvać kampanienty ź vidavočnym vajennym pryznačeńniem.

Učastak darohi kala Dobrapolla prykładna za 20 kiłamietraŭ ad frontu, pakryty achoŭnymi antydronavymi sietkami. 10 lipienia 2025 hoda. Fota: Andriy Dubchak / Frontliner / Getty Images

Sietka pastaŭščykoŭ i sankcyi

Z 2023 hoda ŭ Rasii było zarehistravana nie mienš za 140 vytvorcaŭ bieśpiłotnikaŭ i jašče 60 arhanizacyj, jakija pastaŭlajuć zapčastki abo navučajuć apierataraŭ. Adzin z najbujniejšych rasijskich vytvorcaŭ, Rustakt LLC, ź lipienia 2023 hoda pa śniežań impartavaŭ z Kitaja zapčastak na 577 miljonaŭ dołaraŭ. Paśla ŭviadzieńnia ŭ śniežni 2024 hoda sankcyj ES suprać hetaj kampanii pastaŭki spynilisia, ale abmiežavańni nie zakranuli jaje asnoŭnych kitajskich pastaŭščykoŭ.

Paśla taho, jak najbujniejšy ŭ śviecie vytvorca kamiercyjnych bieśpiłotnikaŭ DJI spyniŭ pramyja prodažy va Ukrainu i Rasiju ŭ 2022 hodzie, hetuju nišu zaniali mienš viadomyja kitajskija firmy. Jany pastaŭlajuć kampanienty naŭprost rasijskim vytvorcam abo navat dapamahajuć im stvarać zavody ŭ Kitai.

Fota: asfpv.ru

Naprykład, rasijskaja kampanija ASFPV LLC publikuje na svaim sajcie fatahrafii svaich zavodaŭ u Kitai, a inšaja, «Striboh», prapanuje stanki dla namotki optavałakna i chvalicca novymi lohkimi kabielami, raspracavanymi ich «kitajskimi inžynierami».

Fota: dron-fpv.rf

Jak adznačaje vydańnie, NATA abvinavačvaje Kitaj u spryjańni rasijskaj ahresii, a ES i ZŠA patrabujuć ad Piekina nie padtrymlivać rasijski vajenna-pramysłovy kompleks. Ale sankcyi pakul nie pieraškodzili patoku tavaraŭ padvojnaha pryznačeńnia — takich, jak kabieli i batarei.

Kamientary da artykuła