«Chavali Sašu ŭ sukiency, jakuju jana vybrała sabie na viasielle». Blizkija dziaŭčyny, jakaja pamierła paśla tatu, raskazali pra trahiedyju
Navina pra śmierć 21‑hadovaj Sašy, jakaja zrabiła tatuiroŭku i pamierła napiaredadni ŭłasnaha viasiella, usio jašče navina numar adzin u Maładziečnie, jaje rodnym horadzie. Trahiedyi papiaredničała tatuiroŭka, zroblenaja ŭ chatnich umovach. Dakładnuju pryčynu śmierci pakul vyśviatlajuć ekśpierty. Blizkija ž raskazali, što niezadoŭha da chvaroby Saša kantaktavała z malečaj, u jakoj paśla taksama znajšli schavanuju pnieŭmaniju, piša Onlíner.
Frahmient tatuiroŭki, jakuju Saša abrała dla naniasieńnia pierad viasiellem
«U Saški ŭsio cieła było ŭ jahonych tatuiroŭkach»
7 kastryčnika Dziaržkamitet sudovych ekśpiertyz paviedamiŭ pra śmierć 21‑hadovaj dziaŭčyny z Maładziečna, jakaja napiaredadni hibieli zrabiła sabie tatuiroŭku. Rodnyja dziaŭčyny raskazali Onlíner, što pakul nie atrymali vynikaŭ ekśpiertyzy, dzie była b paznačana dakładnaja pryčyna jaje śmierci, ale pahadzilisia raskazać pra abstaviny, jakija papiaredničali trahiedyi.
— Saša i A. źbiralisia pažanicca 30 žniŭnia, i ŭsio-ŭsio ŭžo było hatova da ŭračystaści: zaprošany hości, zakazanaja siadziba, kupleny sukienka i padarunki. Paśla ŭsie hetyja ž hości pryjšli nie na viasielle, a na pachavańnie, — nie moža strymać śloz Viera (imia źmieniena), blizkaja svajačka z boku žanicha. — I sukienku Sašy nadzieli tuju, jakuju jana sama vybrała ŭ jakaści viasielnaj.
Saša žyła ŭ Maładziečnie, pracavała ŭ adnym z haradskich kafe povaram. Jaje baćki raźvialisia, kali joj było ŭsiaho piać hadoŭ. Saša zastałasia žyć z baćkam, druhaja žonka jakoha była dla jaje jak maci.
Dva hady tamu jana paznajomiłasia z A., u kancy žniŭnia ŭ ich pavinna było adbycca viasielle. Jaje chłopiec, akramia asnoŭnaj pracy, zachaplaŭsia tatuiroŭkami i rabiŭ ich na damu ŭ asnoŭnym siabram i blizkim znajomym.
— U Saški ŭsio cieła było ŭ jahonych tatuiroŭkach, — uspaminaje Viera. — A. vielmi adkazna da ŭsiaho padychodziŭ, vykonvaŭ usie praviły, sterylnaść. Zrazumieła, što doma… Mnie jon taksama zrabiŭ tatuiroŭku. U mianie vysoki paroh bolu, davodziłasia časta vychodzić palić, dyk A. zaŭsiody mianiaŭ ihołku. I Sašcy rabiŭ, nie moh joj admović…
Niezadoŭha da ŭłasnaha viasiella, 19 žniŭnia (u aŭtorak), Saša paprasiła A. dapracavać tatuiroŭku. Na toj čas u jaje na levym pieradpleččy ŭžo byŭ nabity kontur malunka. A., pa słovach blizkich, uhavorvaŭ Sašu praciahnuć užo paśla viasiella, ale dziaŭčyna nastajała, i chłopiec pravioŭ druhi sieans: chvilin 40 rabiŭ rastušoŭku čornym koleram.
— A. apracavaŭ, jak i naležyć, miesca tatuiroŭki, nie viedaju, jak jana dakładna nazyvajecca, zakleiŭ śpiecyjalnaj plonačkaj. Hajeńnie išło dobra. U čaćvier u Sašy padniałasia tempieratura, jana pryniała haračkapanižalnaje, i ŭ piatnicu joj palahčeła. Ale ŭ subotu Sašy stała horš, jana straciła prytomnaść, i A. vyklikaŭ joj chutkuju dapamohu.
«KT pakazała dvuchbakovuju pnieŭmaniju»
Miedyki, jakija pryjechali, pa słovach surazmoŭnicy, źviarnuli ŭvahu, što ŭ Sašy ŭtvaryŭsia aciok na miescy tatuiroŭki, i pavieźli na špitalizacyju z papiarednim dyjahnazam «siepsis». U balnicy dziaŭčynu adrazu ž pakłali ŭ reanimacyju.
— Kali ŭ jaje ŭziali ŭsie analizy i zrabili KT — vyjaviłasia dvuchbakovaja pnieŭmanija, — raskazała Viera. — Jašče da Sašy z Baraŭlanaŭ vyklikali doktara, dumali pieravieźci jaje tudy. Ale ŭ vyniku vyrašyli, što darohu jana nie pieraniasie, i pakinuli ŭ Maładziečanskaj CRB. A ŭ niadzielu, 24 žniŭnia, nam patelefanavali i skazali, što Saša pamierła. Paśla da ich dadomu prychodzili śledčyja, uziali jaje rečy i mašynku, jakoj A. nabivaŭ tatuiroŭku <…>.
Pa słovach Viery, niezadoŭha da viasiella Saša tolki kazała, što schudnieła na dva kiłahramy, choć charčavałasia jak zvyčajna.
— Ale na zdaroŭje jana nie skardziłasia. U sieradu (na nastupny dzień paśla naniasieńnia tatuiroŭki) jana była ŭ svaich baćkoŭ, jany razam jašče kuplali padarunki da viasiella, i vyhladała «zdarovym dziciem», — raskazała Viera i dadała, što blizkija dziaŭčyny i jaje chłopiec hłyboka pieražyvajuć trahiedyju.
Pa słovach surazmoŭnicy, rodnyja Sašy ni ŭ čym nie vinavaciać A., naadvarot, vielmi imknucca jaho padtrymać: chłopiec, jaki napiaredadni straciŭ niaviestu, zaraz «sam nie svoj».
— Jon vielmi ciažka pieražyvaje śmierć Sašy. Mała taho što jon sam siabie vinavacić u tym, što zdaryłasia, dyk jašče paśla vychadu navin usie stali pisać napramuju, što heta jon vinavaty. Ale my tak nie dumajem. Tamu i baćki Sašy, i blizkija A. — usie jaho sprabujuć padtrymać, i chtości zaŭsiody imkniecca być pobač ź im.
Jašče adzin blizki da siamji dziaŭčyny čałaviek raskazaŭ, što niezadoŭha da taho, jak u Sašy padniałasia tempieratura, jana dahladała maleču blizkich svajakoŭ. Praź niejki čas u toj taksama była vyjaŭlena schavanaja forma pnieŭmanii, jakaja praciakała bieśsimptomna. Voś što jon raskazaŭ:
— Pnieŭmaniju ŭ dziciaci vyjavili vypadkova, kali jany ŭ paŭhoda prachodzili ŭsich daktaroŭ i zdavali analizy. Jaje navat zabirali ŭ reanimacyju, na ščaście, usio abyšłosia. Saša chacieła być jaje chrosnaj mamaj.