Jak adzin ajfon dapamoh brytanskaj palicyi vyličyć bandu, jakuju padazrajuć u kradziažy dziasiatkaŭ tysiač telefonaŭ
Łondanskaja palicyja paviedamiła, što joj udałosia likvidavać mižnarodnuju hrupoŭku, jakuju padazrajuć u adpraŭcy ŭ Kitaj z Brytanii da 40 tysiač skradzienych telefonaŭ.
Na skrynie zapisu bačna, što tyja, chto pravodziŭ apieracyju, znachodzilisia ŭ palicejskaj mašynie biez apaznavalnych znakaŭ; dvoje mužčyn byli aryštavanyja
Palicyja nazyvaje heta najbujniejšaj u historyi Brytanii apieracyjaj pa baraćbie z kradziažami telefonaŭ: aryštavana 18 padazravanych i znojdziena bolš za dźvie tysiačy skradzienych pryład, piša Bi-bi-si.
Palicyja miarkuje, što banda moža być datyčnaja da vyvazu z krainy da pałovy ŭsich smartfonaŭ, skradzienych u Łondanie, dzie adbyvajecca bolšaść kradziažoŭ.
Žurnalisty BBC News atrymali dostup da infarmacyi ab apieracyi, uklučajučy padrabiaznaści ab padazravanych i ich mietadach, a taksama ab rejdach, praviedzienych na dośvitku pa 28 adrasach u Łondanie i hrafstvie Chartfordšyr.
Rasśledavańnie było pačata paśla taho, jak u minułym hodzie adna z achviar rabavańnia adsačyła miescaznachodžańnie skradzienaha telefona.
«Heta było pierad Kaladami, i jana z dapamohaj elektronnych srodkaŭ adsačyła svoj skradzieny ajfon da składa niedaloka ad aeraporta «Chitrou», — skazaŭ detektyŭ-inśpiektar Mark Hevin. — Achova składa pahadziłasia dapamahčy i znajšła smartfon u skryncy siarod 894 inšych pryład».
U levaj skryncy znachodziŭsia telefon, jaki staŭ padstavaj dla pačatku rasśledavańnia
Palicejskija vyjavili, što amal usie telefony z hetaj skrynki byli skradzienyja i pavinny byli adpravicca ŭ Hankonh. Zatym byli pierachoplenyja inšyja partyi, a supracoŭniki palicyi praviali kryminalistyčnuju ekśpiertyzu pasyłak, u vyniku čaho byli ŭstanoŭleny asoby dvuch mužčyn.
Nieŭzabavie ŭłady vyjšli na ich śled. Kadry videarehistratara zafiksavali, jak palicejskija, niekatoryja z elektrašokierami napahatovie, efiektna pierachoplivajuć aŭtamabil pasiarod darohi. U mašynie jany znajšli mabilnyja pryłady, zahornutyja ŭ falhu, — tak udzielniki bandy sprabavali niezaŭvažna pieravieźci ich.
Mužčyn (abodva — hramadzianie Afhanistana va ŭzroście kala 30 hadoŭ) abvinavacili ŭ zmovie z metaj atrymańnia vykradzienaj majomaści i zmovie z metaj utojvańnia abo vyvazu majomaści, atrymanaj złačynnym šlacham.
U ich aŭtamabili było znojdziena niekalki dziasiatkaŭ telefonaŭ, a jašče kala dźviuch tysiač pryład było znojdziena ŭ pamiaškańniach, ź jakimi hetyja mužčyny byli źviazanyja. Treci mužčyna, 29‑hadovy hramadzianin Indyi, byŭ abvinavačany ŭ tych ža złačynstvach.
«Vyjaŭleńnie pieršaj partyi telefonaŭ stała adpraŭnoj kropkaj dla rasśledavańnia, u chodzie jakoha była raskryta mižnarodnaja banda kantrabandystaŭ. Jana, pa našym mierkavańni, moža być adkaznaja za vyvaz da 40% usich telefonaŭ, skradzienych u Łondanie», — kaža Mark Hevin.
Na minułym tydni supracoŭniki palicyi zrabili jašče 15 aryštaŭ padazravanych u kradziažach, zbycie kradzienaha i zmovie z metaj kradziažu.
Usie padazravanyja, za vyklučeńniem adnaho, — žančyny, siarod ich jość hramadzianka Bałharyi. U chodzie rejdaŭ, praviedzienych rańniaj ranicaj, było znojdziena kala 30 mabilnych pryład.
U aŭtamabili byli znojdzieny telefony, zahornutyja ŭ falhu
Za apošnija čatyry hady kolkaść skradzienych u Łondanie telefonaŭ amal patroiłasia: z 28 609 u 2020 hodzie da 80 588 u 2024 hodzie. Try čverci ŭsich telefonaŭ, skradzienych u Vialikabrytanii, kraduć u stalicy.
Horad štohod naviedvajuć bolš za 20 młn čałaviek, a takija turystyčnyja centry, jak Vest-End i Vestminster, źjaŭlajucca lubimym miescam dla złodziejaŭ.
Zhodna z apošnimi danymi Upraŭleńnia nacyjanalnaj statystyki (ONS), kolkaść «kradziažoŭ u ludziej» u Anhlii i Uelsie vyrasła na 15% za 2024‑2025 finansavy hod, dasiahnuŭšy maksimumu z 2003 hoda.
Jaki raście popyt na patrymanyja telefony, jak u Vialikabrytanii, tak i za jaje miežami, ličycca asnoŭnaj pryčynaj rostu kolkaści kradziažoŭ, i mnohija ich achviary ŭ vyniku tak i nie atrymlivajuć svaje pryłady nazad.
Złodziei časta vykarystoŭvajuć elektraviełasipiedy abo mapiedy, kab chutka schavacca ź miesca złačynstva
«My čujem, što niekatoryja złačyncy pierastajuć handlavać narkotykami i pierachodziać na kradziažy telefonaŭ, tamu što heta prynosić bolš prybytku», — kaža ministr pa spravach palicyi Sara Džons.
Pa słovach starejšych aficeraŭ palicyi, hrupoŭka śpiecyjalna nacelvałasia na pryłady Apple z-za ich koštu za miažoj.
U chodzie rasśledavańnia łondanskaj palicyi stała viadoma, što vuličnyja złodziei atrymlivali da 300 funtaŭ za kožny telefon, a niekatoryja skradzienyja pryłady pradavalisia ŭ Kitai pa canie da čatyroch tysiač funtaŭ, pakolki mieli dostup u sietku i byli bolš pryvabnymi dla tych, chto sprabavaŭ abyści cenzuru.
«Heta najbujniejšaja apieracyja pa spynieńni kradziažoŭ mabilnych telefonaŭ i rabavańniaŭ u Vialikabrytanii, jakaja kali-niebudź pravodziłasia łondanskaj palicyjaj, — kaža Endru Fiezierstoŭn, kiraŭnik adździeła pa baraćbie z kradziažami telefonaŭ u staličnaj palicyi. — My likvidavali złačynnyja sietki na ŭsich uzroŭniach, ad vuličnych złodziejaŭ da mižnarodnych arhanizavanych złačynnych hrupovak, jakija štohod ekspartujuć dziasiatki tysiač skradzienych pryład».
Mnohija achviary kradziažoŭ krytykujuć palicyju, u tym liku łondanskuju, za niedastatkovuju efiektyŭnaść.
Časta niezadavolenaść vyklikaje toje, što palicejskija nie dapamahajuć paciarpiełym, kali tyja paviedamlajuć palicyi dakładnaje miescaznachodžańnie skradzienaha telefona, vyličanaje z dapamohaj funkcyi Apple «Łakatar» (Find My) abo anałahičnych servisaŭ dla adsočvańnia hieapazicyi pryłady.
U minułym hodzie telefon 29‑hadovaj Natali Mitčeł skrali na Oksfard-stryt u centry Łondana. Jana pryznajecca Bi-bi-si, što ciapier usia na niervach, kali pryjazdžaje ŭ stalicu.
«Ja vielmi niervujusia tut, i, viadoma ž, ja nie viedaju, chto mianie akružaje. Ja chvalujusia za svaju sumku, chvalujusia za svoj telefon», — skazała jana.
«Ja dumaju, što palicyja Łondana pavinna rabić značna bolš — mahčyma, ustalavać bolš kamier videanazirańnia abo pahladzieć, ci jość mahčymaść zadziejničać palicejskich pad prykryćciom, kab vyrašyć hetuju prablemu, — kaža Mitčeł. — Dumaju, što z-za vialikaj kolkaści vypadkaŭ kradziažoŭ i kolkaści ludziej, jakija źviartajucca da ich, u ich prosta niama resursaŭ i mahčymaściaŭ, kab spravicca z usim hetym».
Sa svajho boku, łondanskaja palicyja, jakaja ŭ apošnija miesiacy raźmiaściła ŭ tyktoku i inšych sacsietkach videaroliki z udziełam palicejskich, jakija zmahajucca z kradziažami telefonaŭ, zajaŭlaje, što ŭ hetym hodzie ŭ Łondanie kolkaść rabavańniaŭ skaraciłasia na 13%, a kolkaść kradziažoŭ — na 14%.
Da kamandy palicejskich, jakija pracujuć u łondanskim Vest-Endzie, pavinny dałučycca jašče kala 80 čałaviek, jakija buduć zajmacca baraćboj z padobnymi złačynstvami.
Ale na praciahu nastupnaha hoda palicyja budzie vymušana skaracić amal dźvie tysiačy supracoŭnikaŭ, a taksama šerah słužbaŭ, kab pakryć deficyt biudžetu ŭ pamiery 260 młn funtaŭ sterlinhaŭ