Homielskuju sudździu, jakaja adpracavała 25 hadoŭ i zajmałasia palityčnymi spravami, vyhnali za sistematyčnyja dyscyplinarnyja parušeńni
Śviatłanu Mažejku źbiralisia ŭklučać u sankcyjnyja śpisy jašče ŭ 2006-m.
Śviatłana Mažejka
Śviatłana Mažejka zvolnienaja z pasady sudździ suda Savieckaha rajona Homiela. Aficyjnaja pryčyna jaje adstaŭki, prapisanaja ŭ ukazie Alaksandra Łukašenki — sistematyčnyja dyscyplinarnyja parušeńni. Heta značyć, što na praciahu hoda Mažejku bolš za dva razy pryciahnuli da dyscyplinarnaj adkaznaści.
Jakimi mahli być hetyja parušeńni? Pavodle Kodeksa ab sudovym ładzie i statusie sudździaŭ, heta mahło być parušeńnie Kodeksu ab honaru sudździ, parušeńnie zakanadaŭstva ab ažyćciaŭleńni pravasudździa (naprykład, kali sudździa znarok vynosiła niezakonnyja prysudy; kali nieznarok, to ličycca, što ničoha strašnaha), nievykanańnie pravił unutranaha pracoŭnaha rasparadku albo ździajśnieńnie inšaj pravinnaści.
Śviatłana Mažejka adpracavała ŭ biełaruskaj sudovaj sistemie bolš za 25 hadoŭ.
Śviatłana Mažejka
Jana pačynała ŭ sudzie Brahinskaha rajona jašče ŭ 1999 hodzie. U 2006‑m Mažejka zhadvałasia ŭ rekamiendacyjach «Viasny» dla ŭniasieńnia ŭ jeŭrapiejskija sankcyjnyja śpisy.
U 2007 jaje pieraviali ŭ sud Vietkaŭskaha rajona, z časam jana stała staršynioj hetaha suda. Tam Mažejka praciahvała razhladać palityčnyja spravy — naprykład, u 2022‑m prysudziła hod kałonii rabotniku «Homsielmaša» Kiryłu Piatrenku.
U śniežni 2022‑ha Mažejku pieraviali ŭ sud Savieckaha rajona Homiela. Tut na jaje rachunku jak minimum niekalki administratyvak za raspaŭsiud «ekstremisckich materyjałaŭ».
Maksimalny ŭzrost, da jakoha možna pracavać sudździoj u sudach ahulnaj jurysdykcyi — 65 hadoŭ. Mažejku zvolnili ź niepryjemnaj farmuloŭkaj u 59 hadoŭ.
Śviatłana Mažejka