Ihar Bokij atrymaŭ ad dziaržavy bolš za $1 miljon pryzavych — a ciapier vyrašyli, što jon zanadta zdarovy dla Paralimpijady
Samy tytułavany płyviec u historyi Paralimpijad siarod mužčyn — biełarus Ihar Bokij — bolš nie zmoža brać udzieł u Paralimpijskich hulniach. Pra heta paviedamiŭ hienieralny sakratar Paralimpijskaha kamiteta Biełarusi Mikałaj Šudziejka ŭ efiry STB.
Ihar Bokij. Fota: Dean Mouhtaropoulos / Getty Images
Pavodle słoŭ Šudziejki, pryčyna — źmiena mižnarodnych pravił spartyŭna-miedycynskaj kvalifikacyi.
Z 2024 hoda dla zimovych i z 2025 hoda dla letnich vidaŭ sportu ŭviedzieny novy kłasifikacyjny kodeks. Zhodna ź im, adna z najbolš raspaŭsiudžanych pryčyn parušeńnia zroku — vysokaja stupień mijapii (blizarukaści) — bolš nie ŭvachodzić u śpis zachvorvańniaŭ, jakija dazvalajuć atletam udzielničać u Paralimpijadzie.
Jak adznačyŭ Šudziejka, hetaje novaŭviadzieńnie ŭdaryła i pa Iharu Bokiju, jaki ciapier straciŭ mahčymaść vystupać na mižnarodnym paralimpijskim uzroŭni.
Jon taksama paviedamiŭ, što Bokij razhladaje mahčymaść zaniacca trenierstvam, choć dla hetaha nieabchodna atrymać adpaviednuju adukacyju — na siońnia jon maje dypłom jurysta. Ale i spartyŭnym funkcyjanieram jon moža stać, dadaŭ Šudziejka.
Iharu Bokiju 31 hod. Jon udzielničaŭ u čatyroch Paralimpijskich hulniach i zavajavaŭ 21 załaty miedal. Na Paralimpijadzie ŭ Paryžy ŭ 2024 hodzie spartsmien atrymaŭ piać uznaharod. U 2024 hodzie jaho adznačyli ordenam Ajčyny II stupieni.
Ahułam jon atrymaŭ ad Biełarusi pryzavymi 1 miljon i 26 tysiač dalaraŭ.