Stała viadoma, jakija proźviščy prykryćcia dali synam Pucina i Kabajevaj

Dva syny Uładzimira Pucina i Aliny Kabajevaj atrymali proźviščy-prykryćci i aformleny ŭ dakumientach jak Ivan i Uładzimir Śpirydonavy, pišuć žurnalisty Raman Badanin i Michaił Rubin u knizie «Caŕ sobstviennoj piersonoj». 

Proźvišča prykryćcia, vidać, źviazanaje ź imiem baćki Pucina Uładzimira Śpirydonaviča, pierakazvaje «Ahientstvo».

Pad vydumanymi proźviščami žyvuć i dočki rasijskaha prezidenta ad pieršaha šlubu — Kaciaryna Cichanava i Maryja Varancova. Proźvišča Cichanavaj, chutčej za ŭsio, pachodzić ad imia pa baćku Kaciaryny Škrebnievaj, babuli pa maci.

Jak Lizavieta Alehaŭna Rudnova ŭ Francyi žyła pazašlubnaja dačka prezidenta Lizavieta Rozava. Aleh Rudnoŭ — pieciarburhski miedyjamieniedžar i daŭni siabar Pucina, jaki pamior u 2015 hodzie.

Pucin i Kabajeva z dvuma synami pravodziać značnuju častku času ŭ Vałdajskaj rezidencyi prezidenta. Dla Kabajevaj, jaje naščadkaŭ i absłuhi tam pabudavanyja asobny draŭlany pałac, spa-centr, zona dziciačaha adpačynku i maštabny park, pisaŭ «Prajekt».

Časam Ivan i Uładzimir usio ž źjaŭlajucca na ludziach, dziakujučy čamu ŭdałosia atrymać ichnija fotazdymki. Jany ŭpieršyniu apublikavanyja ŭ knizie Badanina i Rubina.

Pra toje, što synoŭ Pucina i Kabajevaj zavuć Ivan i Uładzimir, raniej pisała «Daśje». Pry hetym vydańnie nazyvała ich Pucinymi.

Kamientujučy płany Pucina na svoj dzień naradžeńnia, jaho pres-sakratar Dźmitryj Piaskoŭ nie ŭdakładniŭ, ci praviadzie prezident hety dzień u kole svajoj ciapierašniaj siamji. Jon tolki skazaŭ, što Pucina pavinšujuć ź ciepłynioj i luboŭju jaho ŭnuki — dzieci dačok.

Kamientary da artykuła