Pakoi Kaciaryny II źjavilisia ŭ pałacy Paciomkina ŭ Kryčavie
U Kryčavie ŭ pałacy hrafa Paciomkina, jaki vałodaŭ horadam u kancy XVIII stahodździa, źjavilisia novyja interjernyja zały. Pra heta BiełTA raskazaŭ dyrektar Histaryčnaha muzieja h. Kryčava Uładzimir Miščanka.
«Možna skazać, što my ažyćciavili našu daŭniuju maru — u nas adkrylisia dva absalutna novyja, stvoranyja z nula interjernyja zały. Heta puciavyja pakoi impieratrycy Kaciaryny II, — raspavioŭ jon. — Adzin zał — heta pracoŭny kabiniet, a druhi — pakoi. Usie jany ŭkamplektavanyja staradaŭniaj antykvarnaj meblaj XVIII—XIX stahodździaŭ, posudam toj epochi, pradmietami pobytu. Usiaho ŭ dvuch załach raźmieščana bolš za 100 pradmietaŭ antykvaryjatu — pačynajučy ad łožka da niejkich detalaŭ — viejeraŭ, palčatak i žanočych upryhožvańniaŭ. Tut niama nivodnaha novarobu ci mulaža — usio sapraŭdnaje i ŭnikalnaje».
Jak adznačyŭ dyrektar, muziej adkryŭsia ŭ 2008 hodzie. Z taho času zały dapaŭnialisia novymi ekspanatami i pašyralisia, ale novych załaŭ nie stvarałasia. A ciapier tut zaviaršyli histaryčnuju tematyku.
«I heta vielmi važnaja padzieja ŭ žyćci našaha pałaca. Novyja zały dapamohuć pryciahnuć novych naviedvalnikaŭ i turystaŭ ź Biełarusi, Rasii i inšych krain — ludzi ŭžo telefanujuć i cikaviacca, ci pracujuć jany, ci možna naviedać, — padkreśliŭ dyrektar. — Usie viedali, što impieratryca pryjazdžała siudy, spyniałasia na načleh. I ŭsim, viadoma ž, było cikava daviedacca, jak vyhladali pakoi, dzie jana adpačyvała, jak byŭ uładkavany jaje pobyt i volny čas».
Taksama papoŭnilisia novymi ekspanatami staradaŭnaści ŭžo isnujučyja interjernyja zały pałaca — stałovaja, prykazčyckaja i bufietnaja. «U bufietnaj, naprykład, raniej usia mebla była zroblenaja ŭ sučasnaści, ale pad tuju epochu. Ekspanataŭ taksama było niašmat. A ciapier hety zał całkam madernizavali — jaho napoŭnili antykvarnaj meblaj, dapaŭniali detalami. Z taho, što było ŭ bufietnaj da hetaha, zastałasia adna karcina», — adznačyŭ Uładzimir Miščanka.
Usiaho ŭ pałacy źjaviłasia kala 150 novych antykvarnych ekspanataŭ.