U Minsku pa spravie ab koł-centrach sudziać 55 čałaviek
Minski haradski sud pačynaje razhlad kryminalnaj spravy ŭ dačynieńni da 55 udzielnikaŭ mižnarodnaj złačynnaj arhanizacyi. Hrupa dziejničała z 2017 pa 2024 hod u Biełarusi, Rasii i Kyrhyzstanie i vykradała hrošy machlarskim šlacham.
«Abvinavačanyja raźmiaščali ŭ internecie iłžyvuju infarmacyju ab mahčymaści atrymańnia lohkaha dachodu za košt inviestavańnia srodkaŭ u finansavyja prajekty, jakija nasamreč nie isnavali», — raspaviali ŭ Hienprakuratury.
Z zacikaŭlenymi ludźmi źviazvalisia mieniedžary, jakija pierakonvali paciarpiełych pieravodzić hrošy na padkantrolnyja im rachunki. U vyniku ludzi hublali svaje źbieražeńni.
Dla prykryćcia koł-centraŭ rehistravalisia kampanii, jakija nibyta akazvali rekłamnyja pasłuhi. Škoda pa spravie — bolš za 2 miljony rubloŭ.
Na sudzie buduć dapytanyja abvinavačanyja, a taksama bolš za 100 śviedak i paciarpiełych. Abjom materyjałaŭ kryminalnaj spravy składaje bolš za 250 tamoŭ.