U Varšavie ŭ biełarusa skrali jarki Hyundai. Mašyny ŭ Polščy źnikajuć rehularna, maštaby pužajuć
Aŭtamabil byŭ z polskimi numarami.
U supołcy ŭ fejsbuku «Biełarusy ŭ Varšavie» źjaviŭsia čarhovy dopis pra toje, što ŭ polskaj stalicy skrali aŭtamabil, jaki naležaŭ biełarusu.
Niepryjemnaja historyja zdaryłasia z Hyundai Kona — jon źnik u nieviadomym kirunku ŭ noč na 25 vieraśnia.
Fota: skrynšot z supołki ŭ fejsbuk «Biełarusy ŭ Varšavie»
I heta daloka nie adzinkavy vypadak za apošnija hady, pra jaki stanovicca viadoma hramadskaści.
Tak, u kastryčniku 2023 hoda partał «AŭtaHrodna» naličyŭ vosiem takich vypadkaŭ u ad pačatku hoda.
Pryčym z vaśmi mašyn, skradzienych u biełarusaŭ, tady ŭdałosia znajści tolki adnu.
U 2024 hodzie adbyŭsia, mabyć, samy darahi kradziež: u biełarusa skrali Porsche 718 Spyder, košt jakoha pieravyšaŭ $100 tysiač. Aŭtamabil byŭ zarehistravany ŭ Polščy. Na momant kradziažu jon znachodziŭsia na zakrytym parkinhu — i navat heta nie dapamahło.
Taksama ŭžo ŭ pačatku 2025 hoda ŭ biełarusa skrali Lexus UX; mašyna taksama mieła polskuju rehistracyju.
Nasamreč mašyny ŭ Polščy kraduć, nie azirajučysia na nacyjanalnaść abo hramadzianstva ŭłaśnika. Ale tym nie mienš naviny pra toje, što mašynu skrali ŭ biełarusa, źjaŭlajucca rehularna. Pryčyna hetaha kryjecca ŭ ahulnych ličbach kradziažoŭ.
Ličby, jakija pužajuć
Tak, naprykład, za 2023 hod u Polščy było zafiksavana 10 021 kradziažoŭ aŭtamabilaŭ. Letaś — 9820 kradziažoŭ. Ź ich amal 1900 prychodziłasia na Varšavu. Atrymlivajecca, što ŭ polskaj stalicy ŭ siarednim kraduć pa piać mašyn štodnia. Tamu i nie dziŭna, što niaredka ŭ ich lik traplajuć aŭtamabili biełarusaŭ.
Ahułam na Mazavieckaje vajavodstva, da jakoha adnosicca i Varšava, prypadaje da 40% usich zhonaŭ u Polščy.
Admietna, što kali brać danyja za apošni čas, to kraści mašyny ŭ Polščy stali radziej. U 2014‑m było amal 14 tysiač vypadkaŭ. Najhoršym hodam u historyi Polščy ŭ płanie kradziažoŭ mašyn ličycca 1999-y, kali ŭ krainie było skradziena 71 tysiača aŭto.
Hrafik ź ličbami kradziažoŭ aŭto ŭ Polščy z 2013 pa 2023 hod. Krynica danych: palicyja Polščy. Hrafik: autokult.pl
Jakija šancy, što mašynu znojduć?
Danyja pa raskryvalnaści, jakimi z polskim vydańniem Onet letaś padzialiłasia palicyja varšaŭskaha rajona Tarhuvek, nie abnadziejvajuć.
Za šeść miesiacaŭ 2024 hoda ŭ rajonie było zaviedziena 66 kryminalnych spraŭ pa kradziažach aŭtamabilaŭ. Ź ich 62 byli zavieršanyja, ale tolki dźvie skončylisia abvinavaŭčym zaklučeńniem suprać padazravanych. Jašče dźvie spravy byli spynienyja praz adsutnaść składu złačynstva.
Pry hetym u 58 z 62 vypadkaŭ spravy byli spynienyja, bo złačyncu nie ŭdałosia znajści.
Takim čynam, raskryvalnaść pa kradziažach aŭto ŭ hetym rajonie — kala 6,5% pry siarednim pakazčyku pa Varšavie 7,7% pavodle danych za 2023 hod.
Palicyja biaździejničaje?
Biełarusy, jakija sutyknulisia z kradziažami aŭto ŭ Polščy i paśla hutaryli z žurnalistami adznačali nizkuju zacikaŭlenaść u raskryćci spraŭ z boku palicyi.
«Samaje cikavaje, što palicejski ŭčastak znachodzicca za 100 mietraŭ ad miesca stajanki majho aŭtamabila. My adrazu ž pryjšli ŭ pastarunak, kab zajavić pra kradziež, dziažurny zapisaŭ usie źviestki. A dalej pryjšłosia čakać čatyry hadziny, patrul byŭ zaniaty inšaj spravaj», — raskazvaŭ žurnalistam biełarus, u jakoha ŭ 2023‑m skrali trochhadovy Mitsubishi Outlander.
Pa słovach paciarpiełaha, na pytańnie, ci šmat mašyn kraduć u Varšavie, palicejski adkazaŭ, što vielmi šmat, i dadaŭ, što mašyna ŭžo razabranaja na zapčastki, tamu jaje niama sensu šukać.
Biełarus, u jakoha ŭ pačatku heta hoda skrali Lexus, taksama skardziŭsia na adsutnaść inicyjatyvy z boku palicyi.
«Jašče ŭ pieršy viečar aficery stali kazać mnie, što aŭtamabil užo razabrany».
Adziny skradzieny aŭtamabil, jaki ŭdałosia viarnuć biełarusu, byŭ znojdzieny dziakujučy vidavočcu, jaki zaŭvažyŭ mašynu i paviedamiŭ palicyi pra jaje miescaznachodžańnie.
Jakija aŭto čaściej za ŭsio kraduć u Polščy i što ź imi robiać?
Najbolšym popytam u kradziažy aŭtamabilaŭ karystajucca mašyny japonskich i karejskich vytvorcaŭ — na hetyja marki prypadaje kala dźviuch tracin usich kradziažoŭ.
Kala 80% skradzienych mašyn sapraŭdy raźbirajuć na zapčastki. Tak, u śniežni 2023 hoda polskaj palicyi ŭdałosia chutka znajści skradzieny BMW X5, ale niahledziačy na toje, što z momantu kradziažu prajšło ŭsiaho niekalki hadzin, mašynu ŭžo paśpieli pačać razabrać.
Fota: policija.pl
I heta nie adzinkavy vypadak: palicyja nieadnojčy znachodziła skradzienyja aŭto ŭžo ŭ stadyi razboru. Tak, u listapadzie 2023 hoda pablizu Varšavy apieratyŭnaja hrupa «Kobra» vyjaviła bazu złodziejaŭ, abstalavanuju GPS/GSM-hłušycielami.
Ich vykarystoŭvali, kab było niemahčyma znajści mašynu z dapamohaj GPS-trekieraŭ.
A što z kradziažami ŭ Biełarusi? Za 2023 hod u krainie było skradziena 569 aŭto, ź ich 563 znojdziena. U 2024‑m skradziena 496 aŭto, ź ich 495 znajšli.