U Biełaruś dastavili bujnuju partyju bojeprypasaŭ

Z 1 pa 17 vieraśnia ŭ Biełaruś z Rasii była dastaŭlenaja bujnaja partyja bojeprypasaŭ z arsienałaŭ Hałoŭnaha rakietna-artyleryjskaha ŭpraŭleńnia Ministerstva abarony RF na artyleryjskija bazy Ministerstva abarony Biełarusi, daviedałasia Supolnaść čyhunačnikaŭ Biełarusi. Pavodle najaŭnaj infarmacyi, pastaŭki nie byli źviazany z sumiesnymi stratehičnymi vučeńniami «Zachad-2025».

Fota ilustracyjnaje

Pa stanie na 17 vieraśnia ŭ Biełaruś prybyli jak minimum dva vajskovyja ešałony, jakija pieravozili vyklučna vybuchovyja materyjały.

Pieršy ešałon adpraviŭsia sa stancyi Butylicy va Uładzimirskaj vobłaści na stancyju Asipovičy-I i składaŭsia z 11 vahonaŭ:

• 1 kryty vahon dla pravadnikoŭ;
• 5 paŭvahonaŭ-prykryćciaŭ (pustyja vahony, što vykarystoŭvajucca dla achovy hruzu);
• 5 krytych vahonaŭ z vybuchovymi materyjałami.

Ahulnaja masa vybuchovych materyjałaŭ aceńvajecca prykładna ŭ 275—300 ton. Pierasiačeńnie dziaržaŭnaj miažy Rasii i Biełarusi adbyłosia praź miždziaržaŭny stykavy punkt Krasnoje (Rasija) — Asinaŭka (Biełaruś). Adpraŭnikam byŭ 2161‑y centralny arsienał (vajskovaja čaść 96570), a atrymalnikam u Asipovičach — 1405‑ia artyleryjskaja baza bojeprypasaŭ (vajskovaja čaść 42707).

Druhi ešałon adpraviŭsia sa stancyi Kuženkina ŭ Ćviarskoj vobłaści na stancyju Centralit, što na zachodniaj uskrainie Homiela, i składaŭsia z 20 vahonaŭ:

• 1 kryty vahon dla pravadnikoŭ;
• 14 krytych vahonaŭ z vybuchovymi materyjałami;
• 5 paŭvahonaŭ z vybuchovymi materyjałami (zvyčajna tam pieravoziacca kantejniery z rakietnym uzbrajeńniem).

Ahulnaja masa hruza aceńvajecca prykładna ŭ 1 000—1 070 ton. Pierasiačeńnie dziaržaŭnaj miažy Rasii i Biełarusi rabiłasia praź miždziaržaŭny stykavy punkt Zaviarežža — Jeziaryšča. Adpraŭnikam byŭ 93‑ci arsienał Hałoŭnaha rakietna-artyleryjskaha ŭpraŭleńnia Ministerstva abarony RF (vajskovaja čaść 55443-TD), atrymalnikam na stancyi Centralit — 1393‑ci artyleryjski skład bojeprypasaŭ (vajskovaja čaść 52208).

Pavodle papiaredniaj infarmacyi, u najbližejšy čas mohuć adbycca novyja adpraŭki na hetyja artyleryjskija bazy Ministerstva abarony Biełarusi.

Kamientary da artykuła