Minčuki ŭ čacie paskardzilisia na pracu palikliniki. Prapahanda abvinavaciła ŭ čerhach samich naviedvalnikaŭ
«Ažyjataž i adčuvańnie vialikaj kolkaści ludziej u adździaleńni stvarajuć sami žychary mikrarajona».
Fota: belmedsnab.by
U adnym z čataŭ minskaha rajona Łošyca paskardzilisia na piedyjatryčnaje adździaleńnie №1 37‑j haradskoj palikliniki.
Minčanka napisała, što ŭ adździaleńni ŭsiaho 2‑3 piedyjatry absłuhoŭvajuć 12 učastkaŭ i ŭtvarajucca vialikija čerhi. Inšyja dadali, što składana ŭziać tałon da doktara, a kab uziać daviedku, da doktara treba zapisvacca za niekalki tydniaŭ da pryjomu.
Dziaržaŭnaje ahienctva «Minsk-Naviny» nazvała heta ŭkidam.
«Pa stanie na 19 vieraśnia ŭ nazvanym adździaleńni pracujuć šeść daktaroŭ-piedyjatraŭ učastkovych, adzin ź jakich znachodzicca ŭ adpačynku, — prakamientavali ŭ Kamitecie pa achovie zdaroŭja Minharvykankama. — U adździaleńni pracuje kabiniet-filtr pa pryjomie pieršasna chvorych pacyjentaŭ, viaducca pryjomy ŭ piaci kabinietach (№246, 235, 238, 239 i 243)».
Taksama na pryjom niepaŭnaletnich nakiravany vykonvajučy abaviazki namieśnika hałoŭnaha doktara, a z paniadziełka štatnym śpiecyjalistam buduć dapamahać dva daktary-interny, adznačajuć «Minsk-Naviny».
U ažyjatažy ž abvinavacili samich naviedvalnikaŭ palikliniki.
«U paliklinicy rastłumačyli, što ažyjataž i adčuvańnie vialikaj kolkaści ludziej u adździaleńni stvarajuć sami žychary mikrarajona. Da prykładu, kali aboje baćkoŭ abo babula ź dziadulem supravadžajuć dzicia. Asabliva heta prykmietna pa piatnicach: u hety dzień mnohija imknucca «zakryć balničnyja», — krytykuje dziaržaŭnaje ahienctva.