Tramp zabłakavaŭ vajennuju dapamohu Tajvaniu dziela handlovaj ździełki z Kitajem
Hetaje rašeńnie aznačaje pavarot u palitycy ZŠA ŭ dačynieńni da Tajvania, jaki Kitaj ličyć svajoj terytoryjaj.
Fota: Joe Raedle / Getty Images
Prezident ZŠA admoviŭsia ŭchvalić pakiet vajennaj dapamohi Tajvaniu na $400 młn z-za pieramovaŭ ab handlovaj ździełcy z Kitajem i mahčymaj sustrečy z staršynioj KNR Si Czińpinam, raspaviali Washington Post piać infarmavanych krynic.
Pavodle ich słoŭ, hetaje rašeńnie aznačaje pavarot u palitycy ZŠA ŭ dačynieńni da Tajvania, jaki Kitaj ličyć svajoj terytoryjaj.
Dźvie krynicy vydańnia adznačyli, što zabłakavany pakiet dapamohi byŭ «bolš śmiarotny», čym papiarednija, i ŭklučaŭ u siabie bojeprypasy i bieśpiłotniki.
Pradstaŭnik Biełaha doma zajaviŭ WP, što rašeńnie pra pakiet dapamohi jašče nie pryniata kančatkova.
Pavodle danych amierykanskaj raźviedki, Si Czińpin daručyŭ Narodna-vyzvalenčaj armii Kitaja (NVAK) naroščvać siły i pravodzić bolš składanyja vučeńni vakoł Tajvaniu, kab być hatovymi da jaho zachopu ŭ 2027 hodzie.
Pry hetym ZŠA dahetul umacoŭvali abaranazdolnaść Tajvaniu za košt adpraŭki zbroi. Kanhres vydzialaŭ na hetyja mety Biełamu domu $1 młrd u hod.
Apošni pakiet dapamohi vydzieliŭ prezident Džo Bajden — pierad sychodam z pasady jon adpraviŭ Tajvaniu zbroi na $571 młn.
U administracyi Trampa ličać, što kraina maje bujnuju i kvitniejučuju ekanomiku, tamu jana pavinna płacić za pastaŭki amierykanskaj zbroi hetak ža, jak i krainy Jeŭropy. Sam Tramp nieadnarazova zajaŭlaŭ, što Kitaj nie budzie ŭryvacca na Tajvań, pakul jon znachodzicca na pasadzie prezidenta ZŠA.