Bałharskich spartsmienaŭ na Alimpijadzie-2026 mohuć adpravić pad niejtralny ściah

17 vieraśnia 2025 hoda adbyłasia pres-kanfierencyja Bałharskaha alimpijskaha kamiteta (BAK), jakuju praviała jaho staršynia Viesieła Lečava razam z kiraŭnictvam arhanizacyi. Asnoŭnaj temaj sustrečy stała kryzisnaja situacyja vakoł kanfliktu pamiž ciapierašnim kiraŭnictvam BAK i papiarednim, jakoje ŭznačalvała słavutaja ŭ minułym lohkaatletka Stefka Kastadzinava.

Bałharskaja zbornaja na adkryćci Zimovych Alimpijskich hulniaŭ 2022 hoda ŭ Piekinie. Fota: David Ramos/Getty Images

Viecieła Lečava zaniała pasadu kiraŭnicy bałharskaha NAK u sakaviku, pieramohšy na vybarach Kastadzinavu. Adnak vyniki hałasavańnia byli asprečanyja ŭ sudzie, i dahetul situacyja ŭnutry kamiteta zastajecca napružanaj.

Pavodle słoŭ Viesieły Lečavaj, Mižnarodny alimpijski kamitet (MAK) jašče ŭ mai pryznaŭ novaje kiraŭnictva i vystaŭlaŭ umovy, jakija musiła vykanać staroje. Ale hetyja ŭmovy vykananyja nie byli.

Z-za hetaha isnuje niebiaśpieka sankcyj suprać Bałharyi, uklučajučy zabaronu na ŭdzieł nacyjanalnaj kamandy ŭ Zimovych Alimpijskich hulniach 2026 hoda pad ułasnym ściaham.

Viesieła Lečava padkreśliła, što Kastadzinava ŭsio jašče fihuruje na sajcie BAK i karystajecca alimpijskaj simvolikaj, choć nie maje na heta prava. Jana zaklikała jaje vykanać patrabavańni MAK, kab paźbiehnuć novych sankcyj i «hańby dla krainy».

Hienieralny sakratar BAK Danaił Dzimaŭ dadaŭ, što MAK užo prypyniŭ finansavańnie arhanizacyi i jość ryzyka stracić dostup da budučych mižnarodnych prahram padtrymki.

Zimovyja Alimpijskija hulni — 2026 adbuducca z 6 pa 22 lutaha ŭ italjanskich haradach Miłan i Karcina-d'Ampieca.

Kamientary da artykuła