MZS Polščy pra zakryćcio miažy: Dumajem pierš za ŭsio pra dziaržaŭnuju biaśpieku, a nie pra ekanamičnuju vyhadu abo vydatki

15 vieraśnia pres-sakratar MZS Polščy Pavieł Vroński na bryfinhu paśla pieramovaŭ ministraŭ zamiežnych spraŭ Polščy i Kitaja Radasłava Sikorskaha i Van I prakamientavaŭ mahčymaść adkryćcia polska-biełaruskaj miažy.

Ministr zamiežnych spraŭ Polščy Radasłaŭ Sikorski i ministr zamiežnych spraŭ Kitaja Van I padčas sustrečy 15 vieraśnia. Fota: MZS Polščy

Pavieł Vroński padkreśliŭ, što ŭ svajoj dziejnaści polski ŭrad kirujecca pierš za ŭsio mierkavańniami dziaržaŭnaj biaśpieki, a nie dumaje pra ekanamičnuju vyhadu abo vydatki, źviazanyja z zakryćciom.

Pavodle Vrońskaha, analizy koštu zakryćcia miažy nie pravodzilisia, bo pryjarytetam źjaŭlajecca biaśpieka, a vydatki razhladajucca tolki paśla pryniaćcia rašeńnia.

Pradstaŭnik MZS adznačyŭ, što polski ŭrad nie infarmavaŭ jeŭrapiejskich partnioraŭ pra namier zakryć miažu, pakolki heta suvierennaje rašeńnie Polščy.

Padčas sustrečy z kitajskim bokam abmiarkoŭvalisia pytańni adnosin Polščy ź Biełaruśsiu i zakryćcia pamiežnych pierachodaŭ. Polski bok zajaviŭ, što zakryćcio miažy — niavyhadnaja z ekanamičnaha punktu hledžańnia miera, ale nieabchodnaja z-za nieadnarazovych pravakacyj z boku Biełarusi.

Vroński taksama nahadaŭ pra destruktyŭnyja dziejańni Rasii, pra jakija polski bok papiaredziŭ kitajskich partnioraŭ, i vykazaŭ nadzieju, što Kitaj akaža peŭnaje supraćdziejańnie dziejańniam Maskvy i Minska.

Pa słovach pradstaŭnika MZS, paśla zakančeńnia pieramoŭ płanavanyja publičnyja zajavy ministraŭ ab vynikach sustrečy byli skasavanyja pa prośbie kitajskaha boku. Adrazu paśla hetaha kiraŭnik MZS Kitaja nakiravaŭsia na sustreču z prezidentam Polščy Karalem Naŭrockim.

Kamientary da artykuła