Tehieran uchvaliŭ adnaŭleńnie supracoŭnictva z MAHATE
Viarchoŭny saviet nacyjanalnaj biaśpieki Irana ŭchvaliŭ raniej padpisanyja damoŭlenaści ab adnaŭleńni supracoŭnictva ź Mižnarodnym ahienctvam pa atamnaj enierhii.
Dakumient byŭ padpisany 9 vieraśnia ŭ Kairy hienieralnym dyrektaram MAHATE Rafaelem Hrosi i ministram zamiežnych spraŭ Irana Abasam Arakčy pry pasrednictvie ministra zamiežnych spraŭ Jehipta Badra Abdel-Aty, piša Deutsche Welle.
Jak vynikaje z tekstu zajavy, vykanańnie damoŭlenaściaŭ budzie zaležać ad zabieśpiačeńnia biaśpieki iranskich jadziernych abjektaŭ.
Supracoŭnictva pamiž Tehieranam i MAHATE było prypyniena paśla 12-dzionnaj vajny ŭ červieni, kali Izrail i ZŠA nanieśli ŭdary pa jadziernych abjektach Irana ŭ Forda, Natanzie i Isfachanie. U adkaz Isłamskaja Respublika atakavała Izrail sieryjaj udaraŭ rakietami i dronami. Inśpiektary MAHATE byli vysłany z krainy 2 lipienia pa ŭkazie prezidenta Irana Masuda Piezieškijana, jaki abvinavaciŭ pradstaŭnikoŭ ahienctva ŭ biaździejnaści padčas atak na jadziernyja abjekty.
Raniej Rafael Hrosi nastojvaŭ na tym, kab Tehieran dazvoliŭ pravieści mižnarodnuju pravierku na troch jadziernych abjektach, paškodžanych padčas vajny ŭ červieni 2025 hoda, dla acenki škody i zapasaŭ uzbahačanaha ŭranu. Urad u Tehieranie nieadnarazova admaŭlaŭ inśpiektaram ahienctva ŭ takoj praviercy.