ZŠA prapanavali krainam G7 pačać kanfiskacyju zamarožanych reziervaŭ Rasii

Administracyja Donalda Trampa prapanavała krainam G7 pačać kanfiskacyju zamarožanych zołatavalutnych reziervaŭ Rasii, jakija byli zabłakavanyja ŭ vyniku sankcyj. Pra heta paviedamlaje Bloomberg sa spasyłkaj na jeŭrapiejskich dypłamataŭ i prajekt prapanovy ZŠA.

Bieły dom. Fota: Walter Bibikov / Getty Images

Pavodle źviestak Bloomberg, ZŠA ŭžo abmierkavali svaju ideju z pradstaŭnikami Jeŭropy, dzie znachodzicca kala dźviuch tracin zamarožanych rasijskich aktyvaŭ. Ciapier ES vykarystoŭvaje dla dapamohi Ukrainie tolki prybytki ad inviestavańnia hetych srodkaŭ. Amierykancy ž prapanujuć pastupova kanfiskoŭvać asnoŭnuju sumu i stvaryć dla hetaha pravavuju bazu, kab nakiroŭvać hrošy na apłatu vajskovaj padtrymki Kijeva.

Akramia taho, kab prymusić Pucina sieści za stoł pieramoŭ, Tramp prapanuje ŭvieści da 100% mytnych pošlin suprać Indyi i Kitaja za kuplu rasijskaj nafty. Ale heta adbudziecca tolki ŭ tym vypadku, kali Jeŭropa dałučycca da takoj palityki.

Usiaho zachodnija krainy zamarozili kala $300 miljardaŭ rasijskich reziervaŭ — heta prykładna pałova ad usiaho abjomu. Ź ich Jeŭrasajuz zabłakavaŭ kala €200 miljardaŭ, uvioŭšy sankcyi suprać rasijskich Minfina, Centrabanka i Fondu nacyjanalnaha dabrabytu jašče ŭ pačatku vajny.

Aficyjna rasijski Centrabank praciahvaje ŭklučać hetyja srodki ŭ svaje zołatavalutnyja reziervy, jakija na pačatak vieraśnia aceńvalisia ŭ $689,4 miljarda. Adnak realna dastupnaja suma moža być amal udvaja mienšaj, bo pad błakavańnie trapili ŭsie valuty, akramia kitajskich juaniaŭ na $100 miljardaŭ. Taksama Rasija maje załaty zapas u bolš jak 2 tysiačy ton, jaki ŭ pačatku vieraśnia aceńvaŭsia prykładna ŭ $254,9 miljarda.

Kamientary da artykuła