Łukašenka sustreŭsia z pradstaŭnikom Trampa Džonam Koŭłam
«Razmova, jakaja ciahnułasia kala piaci hadzin», — paviedamiŭ Puł pieršaha.
«Ja vas vitaju ŭ Biełarusi. Dziakuj, što znachodzicie čas pabyvać u Biełarusi. Čas niaprosty», — skazaŭ Łukašenka na pačatku sustrečy.
Jon prapanavaŭ abmierkavać šerah pytańniaŭ, da jakich baki padychodzili nie adzin raz. «Pa-pieršaje, heta ŭvieś kompleks biełaruska-amierykanskich adnosin. Ja prapanuju taksama ščyra zakranuć pytańni situacyi ŭ śviecie ŭ kantekście intaresaŭ ZŠA i Biełarusi. Nikudy nie sydziem ad pytańniaŭ vajny i miru», — zajaviŭ Alaksandr Łukašenka.
Najvažniejšym pytańniem jon taksama nazvaŭ śfieru ekanomiki: «Dumaju, u vas jość intaresy da Biełarusi i praź Biełaruś — da Rasii ŭ halinie ekanomiki. Naturalna, u nas vialikaja cikavaść da vašaj hłabalnaj krainy ŭ płanie ekanomiki».
«Ja dumaŭ, što skazać najpierš. Ale, jak by heta ni prahučała banalna, ja chaču padziakavać vašamu prezidentu (nie tamu, što chaču jamu padlizvacca — heta mnie nie ŭłaściva) za tyja namahańni, jakija jon prykładaje ŭ napramku miru, i najpierš u našym rehijonie, — skazaŭ Łukašenka. — Siem, šeść — spyniŭ vojnaŭ abo kanfliktaŭ — nie važna. Jon spyniŭ niamała kanfliktaŭ. Kažu jak historyk i jak prezident, jaki ŭžo doŭha pracuje: ni adzin prezident Złučanych Štataŭ Amieryki nie prykłaŭ stolki namahańniaŭ i takich namahańniaŭ, kab na płaniecie byŭ mir. Dumaju, z ekanomikaj, z pošlinami vy raźbieraciesia sami. Tym nie mienš, ja ŭdziačny, Džon, tvajmu siabru Donaldu za tyja namahańni, jakija jon ažyćciaŭlaje ŭ suśvietnaj palitycy siońnia».
«Dziakuj! Vielmi vysoka caniu vašy słovy», — adkazaŭ na hetyja słovy Džon Kouł.
Alaksandr Łukašenka padkreśliŭ važnaść taho, kab ZŠA i dalej praciahvali dziejničać u hetym napramku: «Hałoŭnaje ciapier, jak ja heta baču (nie tolki ja — vy viedajecie, što niadaŭna adbyłasia narada ŠAS, šmat pra heta havaryli, asabliva ŭ kułuarach), kab Donald, niahledziačy na jaho taki burny, vybuchovy charaktar, nie astyŭ da hetaj temy. Hałoŭnaje, kab vy — amierykancy — vytrymali toj trend, jaki vy siońnia zadali ŭ častcy mirnaha pahadnieńnia. Asabliva tut, u rehijonie — u kanflikcie Rasii i Ukrainy».
«I hałoŭnaje — žadaju vam pabolš abjektyŭnaści. Treba słuchać usich — heta Donald umieŭ rabić, ale vysnovy jon pavinien rabić sam,» — dadaŭ Łukašenka
***
Jak zvyčajna adbyvajecca ŭ takich situacyjach, čakajecca, što ŭ jakaści «padarunka» buduć vyzvalenyja palitviaźni.
Minuły raz paśla sustrečy z Kitam Kiełaham 21 červienia byli vyzvalenyja 14 palitviaźniaŭ na čale ź Siarhiejem Cichanoŭskim.