ŚMI Paŭnočnaj Karei vyrazali ź vinšavańnia Łukašenki frazu pra «hatoŭnaść naviedać vašu krainu»
Centralnaje telehrafnaje ahienctva Karei (CTAK) tolki 11 vieraśnia raźmiaściła na sajcie tekst vinšavalnaj telehramy ad Alaksandra Łukašenki z nahody Dnia ŭtvareńnia KNDR. Pry hetym samo vinšavańnie padvierhłasia cenzury, źviarnuŭ uvahu Reform.news.
Łukašenka i Kim Čen Yn u Piekinie 3 vieraśnia pierad paradam. Fota: Puł pieršaha
Pres-słužba Łukašenki apublikavała vinšavańnie jašče 9 vieraśnia. Centralnaj častkaj stała fraza pra hatoŭnaść naviedać KNDR u bližejšy čas.
«Ź ciepłynioj uspaminaju našu niadaŭniuju sustreču ŭ Piekinie. Paćviardžaju hatoŭnaść u bližejšy zručny dla bakoŭ čas naviedać vašu krainu dla vyvadu miždziaržaŭnych suviaziaŭ na jakasna novy ŭzrovień», — havaryłasia ŭ tekście telehramy.
CTAK raźmiaściła vinšavańnie tolki siońnia i pakul tolki na karejskaj movie, chacia ŭ ich jość poŭnafarmatnyja anhlijskaja i ruskaja viersii sajta. Frazy pra «hatoŭnaść naviedać vašu krainu» tam nie akazałasia.
Na adcenzuravany tekst, jaki retranślavali inšyja paŭnočnakarejskija ŚMI, źviarnuli ŭvahu paŭdniovakarejskija ŚMI.
Nahadajem, Łukašenka i Kim Čen Yn parazmaŭlali ŭ kułuarach śviatočnych mierapryjemstvaŭ u Piekinie 3 vieraśnia. Jak paviedamiła pres-słužba Łukašenki, paŭnočnakarejski lidar zaprasiŭ jaho naviedać Pchieńjan.