U Polšču zalacieli bolš za dva dziasiatki rasijskich dronaŭ, a nie 10
Padčas načnoha parušeńnia pavietranaj prastory Polščy było vyjaŭlena bolš za 20, najchutčej 23 rasijskija bieśpiłotniki. Pa ich stralali hałoŭnym čynam niderłandskija F-35, piša Rczeczpospolita.pl.
Adzin z dronaŭ paškodziŭ dom u vioscy Vyryki. Skrynšot videa TVP Info
Unačy adbyłosia biesprecedentnaje parušeńnie pavietranaj prastory Polščy. «Polskija i sajuźnickija srodki nazirańnia radarna nazirali niekalki dziasiatkaŭ abjektaŭ, i adnosna tych, jakija mahli ŭjaŭlać pahrozu, Apieracyjny kamandzir Uzbrojenych sił pryniaŭ rašeńnie ab ich niejtralizacyi. Častka dronaŭ, jakija ŭvarvalisia ŭ našu pavietranuju prastoru, była źbita. Viaducca pošuki i łakalizacyja mahčymych miescaŭ padzieńnia hetych abjektaŭ», — paviedamiła Apieracyjnaje kamandavańnie Uzbrojenych cił Polščy.
Jak nieaficyjna daviedałasia vydańnie, abjektaŭ było adnak bolš za 20, najchutčej — 23.
Častka ź ich była źbita. Havorka, vierahodna, išła pra abjekty, jakija pry padzieńni mahli niešta paškodzić. Dla ich źbićcia byli vykarystany bajavyja samaloty. Viadoma, što ŭ apieracyi brali ŭdzieł niderłandskija F-35, jakija źjavilisia ŭ Polščy pieršaha vieraśnia i pavinny zastacca tut da kanca hoda.