Ci pakarajuć niepryšpilenaha Karajeva za parušeńnie PDR? Voś što adkazali ŭ DAI
«Fotažurnalist» Arciom Turłaj apublikavaŭ u TikTok videa sa słužbovaha aŭtamabila hubiernatara Hrodzienskaj vobłaści Juryja Karajeva. Na im vidać, što pasažyry aŭto nie pryšpilenyja ramianiami biaśpieki. «Lusterka» źviarnułasia ŭ DAI Hrodzienskaha abłvykankama, kab daviedacca, jakoj budzie reakcyja na parušeńnie kiraŭnikami rehijona praviłaŭ darožnaha ruchu.
Źleva — kiroŭca słužbovaha aŭtamabila, sprava — staršynia Hrodzienskaha abłvykankama Juryj Karajeŭ padčas pajezdki. Hrodna, vierasień 2025 hoda. Skrynšot: artem_pul / TikTok
Što adbyłosia
Videa znutry słužbovaha aŭto źniaŭ Arciom Turłaj, jaki pradstaŭlajecca «fotažurnalistam hubiernatara Hrodzienskaj vobłaści», a taksama viadzie telehram-kanał «Puł 4 Riehion». Na kadrach — eks-kiraŭnik MUS, a ciapier staršynia Hrodzienskaha abłvykankama Juryj Karajeŭ, jaho pieršy namieśnik Juryj Valavaty, a taksama kiroŭca, tvaru jakoha nie vidać.
Rolik pryśviečany tamu, jak Karajeŭ čytaje ŭ TikTok kamientary da jaho ŭłasnych videa. Ale žurnalisty źviarnuli ŭvahu na inšy važny momant: zdajecca, nichto ź ludziej na momant zdymki nie byŭ pryšpileny ramianiami biaśpieki.
Heta zaŭvažyli i kamientatary pad videa:
- «A pryšpilicca ŭ aŭto jany ŭsie nie chočuć, jak zahadvajuć PDR, ci im parušać možna? I DAI, mabyć, nie spyniaje».
- «Čamu nie pryšpilenyja?»
- «Usio pačynajecca z kiraŭnictva. Nie pryšpilvajucca, parušajuć, im usio možna, i dzieciam ich…»
- «Nie pryšpilenyja, i, mabyć, zimovuju humu stavić taksama nie buduć».
«U lubym vypadku kiraŭnictva budzie ź im źviazvacca»
Z pytańniem pra toje, ci budzie reakcyja na pavodziny čynoŭnikaŭ, žurnalistka «Lusterka» patelefanavała ŭ DAI Hrodzienskaha abłvykankama jak aburanaja niespraviadlivaściu hramadzianka.
Joj udałosia pahavaryć z namieśnikam načalnika mižrajonnaha rehistracyjna-ekzamienacyjnaha adździeła Alaksandram Pabudziejem. Udakładniŭšy, telefanuje jana pa kamientar ci prosta «paskardzicca na hubiernatara», jon raskazaŭ detali:
— U lubym vypadku kiraŭnictva [Dziaržaŭtainśpiekcyi Hrodna] budzie ź im [Karajevym] źviazvacca, i heta [abmierkavańnie situacyi] budzie praviedzienaje. < … > Mahčyma, najbližejšym časam budzie post ad jaho z hetaj nahody. Abviaržeńnie hetaha. Mahčyma, navat prabačeńni buduć.
— To-bok užo zajmalisia hetym pytańniem? Ci heta vy tak dapuścili?
— Nie, budzie kiraŭnictva [raźbiracca], adpaviedna, budzie ŭsio praviedzienaje. I budzie prymacca rašeńnie z hetaj nahody. <…> Miery, viadoma, buduć pryniatyja.
Raniej byli precedenty, kali čynoŭnikaŭ pryciahvali da adkaznaści za parušeńnie PDR. Tak, u sakaviku 2018 hoda ŭ efir ANT vyjšaŭ siužet, pryśviečany Kapylščynie i Hodu małoj radzimy. Padčas zdymak staršynia Kapylskaha rajvykankama Anatol Linievič i karespandentka telekanała Volha Sulimava niekalki razoŭ sadziacca ŭ aŭtamabil, ale nie pryšpilvajucca ramianiami biaśpieki. Na zadnim siadzieńni možna zaŭvažyć jašče i teleapieratara, jaki taksama jedzie niepryšpilenym.
Adzin z telehledačoŭ skiravaŭ u DAI zajavu, dzie vykłaŭ sutnaść parušeńnia. Jamu adkazali, što «pa vynikach praviedzienaj pravierki kiroŭca i pasažyr aŭtamabila Hyundai pryciahnutyja da administracyjnaj adkaznaści».
A voś štrafavać Alaksandra Łukašenku ŭ MUS nie navažvalisia. Toj jak minimum dvojčy traplaŭ na kadry žurnalistaŭ za rulom słužbovaha Mercedes-Benz S-Class W221 (u 2015 i 2021 hadach) ź niepryšpilenym ramianiom biaśpieki.