Tramp: Vašynhton nie rychtujecca da zrynańnia Madury

Vašynhton nie rychtujecca da źmieny režymu ŭ Vieniesuele, zajaviŭ prezident ZŠA Donald Tramp na fonie paviedamleńniaŭ ab tym, što ZŠA vyrašyli raźmiaścić na aeradromie ŭ Puerta-Ryka ŭ Karybskim mory 10 źniščalnikaŭ F-35 dla praviadzieńnia apieracyj suprać narkakartelaŭ, piša Bi-bi-si.

Nikałas Madura. Fota: Jesus Vargas / Getty Images

U piatnicu adzin z žurnalistaŭ spytaŭ Trampa ŭ Biełym domie, chacieŭ by toj źmieny režymu ŭ Vieniesuele.

«My pra heta nie havorym», — adkazaŭ prezident ZŠA. «Ale my havorym pra toje, što ŭ [Vieniesuele] prajšli vybary, jakija, miakka kažučy, byli vielmi dziŭnymi», — Tramp, majučy na ŭvazie prezidenckija vybary letaś i abvinavačvańni ŭ falsifikacyi vynikaŭ.

Telekampanija CNN śćviardžaje, spasyłajučysia na krynicy, što Tramp razhladaje mnostva varyjantaŭ naniasieńnia vajennych udaraŭ pa narkakartelach, jakija dziejničajuć u Vieniesuele, uklučajučy mahčymuju parazu celaŭ unutry krainy ŭ ramkach bolš šyrokaj stratehii, nakiravanaj na pasłableńnie prezidenta krainy Nikałasa Madury.

U aŭtorak ZŠA nanieśli ŭdar pa sudnie ŭ mižnarodnych vodach, jakoje, jak zajaviŭ Tramp, pieravoziła narkotyki ŭ paŭdniovaj častcy Karybskaha mora. Zahinuli 11 čałaviek, sudna zatanuła.

Krynicy CNN raspaviali, što ŭdar pa sudnie, jaki ruchaŭsia ź Vieniesueły, byŭ tolki pačatkam «značna bolš maštabnych namahańniaŭ pa zbavieńni rehijonu ad narkatrafiku i patencyjnamu adchileńniu Madury ad ułady».

Jak udakładniła adna z krynic, pakul niama nijakich prykmiet taho, što Tramp užo pryniaŭ rašeńnie nanieści vajennyja ŭdary pa celach unutry Vieniesueły. Adnak dva surazmoŭcy ź Biełaha doma nie vyklučyli mahčymaści padobnych udaraŭ u budučyni.

***

Prezidenckija vybary ŭ Vieniesuele prajšli ŭ lipieni minułaha hoda. Nacyjanalnaja vybarčaja rada Vieniesueły abviaściła, što prezidenckija vybary ŭ krainie vyjhraŭ dziejny kiraŭnik krainy Nikałas Madura z 51,2% hałasoŭ. Kandydat ad apazicyi, 74-hadovy Edmunda Hansales 44,2% hałasoŭ.

Apazicyja z vynikami nie pahadziłasia. Sabranyja joj danyja pakazali, što Hansales sabraŭ 2/3 hałasoŭ, vyjhraŭšy 38 pracentaŭ u Madura, nabraŭšy 7,3 miljona hałasoŭ suprać 3,3 miljona hałasoŭ. ZŠA vypuścili zajavu, u jakim nazvali Edmunda Hansalesa zakonnym pieramožcam vybaraŭ. U Jeŭropie damovilisia nie pryznavać abrańnie Madura prezidentam Vieniesueły. 

Potym Edmunda Hansales pakinuŭ krainu, paprasiŭšy prytułku ŭ Ispanii.

Kamientary da artykuła