Tusk: Zatrymany ŭ Biełarusi manach naviedvaŭ svajho znajomaha śviatara. My rychtujem miery ŭ adkaz suprać Minska
Premjer-ministr Polščy Donald Tusk paabiacaŭ adkaz na zatrymańnie hramadzianina Polščy ŭ Biełarusi nibyta za špijanaž.
Donald Tusk. Fota: kancylaryja premjer-ministra Polščy
Donald Tusk nazvaŭ abvinavačańni manacha-karmielita Hžehaža Havieła ŭ špijanažy absurdnymi. Pavodle mierkavańnia kiraŭnika polskaha ŭrada, heta pravakacyja biełaruskich śpiecsłužbaŭ, piša Onet.
«Ja byŭ u kantakcie z našymi słužbami, razmaŭlaŭ taksama ź ministram Sikorskim nakont našaj reakcyi. Adno jasna. Abvinavačańni biełaruskaha boku absurdnyja. Pavodle viersii Biełarusi, polski manach pavinien byŭ atrymlivać materyjały, źviazanyja z vučeńniami «Zachad». Nie moža być i havorki pra toje, kab my pryniali taki vid pravakacyj», — skazaŭ Tusk.
Pavodle jaho słoŭ, Polšča padrychtuje adpaviednyja miery, kali sprava chutka nie prajaśnicca.
«Ja dahetul nie ŭpeŭnieny, jaki byŭ charaktar vizitu našaha manacha. Pa majoj infarmacyi, jon naviedvaŭ svajho znajomaha, śviatara, jaki žyvie ŭ Biełarusi. Na hety momant viadoma tolki heta.
Viadoma, my prymajem dypłamatyčnyja kroki, ale, jak vy viedajecie, Łukašenka nie najlepšy partnior dla hetaha. Nie varta čakać z taho boku dobraj voli. My rychtujem, skažu ščyra, adpaviednyja miery, kali hetaja situacyja nie źmienicca. I ŭ vielmi karotkija terminy», — zajaviŭ polski premjer.
Jon dadaŭ, što paśla viartańnia ministra zamiežnych spraŭ Radasłava Sikorskaha z ZŠA ŭrad «padrychtuje płan dziejańniaŭ na bližejšyja tydni ŭ adnosinach da Biełarusi».
Napiaredadni KDB abviaściŭ pra zatrymańnie ŭ Lepieli 27-hadovaha hramadzianina Polščy. U prapahandysckim siužecie havorycca, što mužčyna nibyta zdabyŭ sakretny płan vučeńniaŭ «Zachad-2026».
Zatrymany palak vyjaviŭsia manacham-karmielitam Hžehažam Haviełam.