«Vybar vialiki, ale kvietki darahija». Kolki kaštujuć napiaredadni 1 vieraśnia bukiety na Kamaroŭcy?
Pahladzieli ceny na kvietki na samym papularnym rynku Biełarusi.
Kvietki na Kamaroŭcy. Skrynšot videa ŭ tyktoku.
Prapanoŭvać kvietki pačynajuć jašče ŭ padziemnym pierachodzie la mietro «Płošča Jakuba Kołasa». Tut za bukiet z adzinaccaci hładyjołusaŭ prosiać 40 rubloŭ, piać viarhiniaŭ hatovy addać za 25 rubloŭ. Jość i astry — ad 20 da 30 rubloŭ za bukiet.
Na samoj Kamaroŭcy astraŭ niašmat i vyhladajuć jany nie vielmi pryvabna. Ale i ceny nie šakujuć — pa 2 rubli za štuku. Za viarhini prosiać užo pa 5 rubloŭ za kvietku.
Hładyjołusy pa 8 rubloŭ, ale kali nabyvać bukiet, a tak za adnu štuku 10. Jość bukiety sa słaniečnikami za 50 rubloŭ. Šmat košykaŭ z kvietkami na rozny hust i hamaniec — ad 25 da 75 rubloŭ.
Taki košyk niekalki dzion tamu pradavali za 50 rubloŭ. Fota z Threads
Treba adznačyć, što ceny na kvietki na Kamaroŭcy pierad 1 vieraśnia adčuvalna vyraśli. Jašče 13 žniŭnia hładyjołusy pradavali ŭ dva razy tańniej — pa 5 rubloŭ za štuku. Słaniečniki taksama byli ŭsiaho pa 5 rubloŭ (ciapier pa 10). Hartenziju pradavali ad 3 da 7 rubloŭ za štuku.
Darečy, najbolš papularnymi kvietkami dla školnikaŭ pradaŭcy nazyvali hładyjołusy, viarhini dy słaniečniki.
Ciapierašnimi cenami na Kamaroŭcy aburyłasia navat viadomaja dyjetołah i błohierka Iryna Jabłonskaja: «Nie viedaju, pra jakija tannyja kvietki na Kamaroŭcy vy pisali ŭsie hetyja dni. Vybar vialiki, ale kvietki darahija». Niekalki dzion tamu jana nabyła na rynku dva bukiety astraŭ i viarhiniaŭ i zapłaciła 84 rubli.
Kvietki Iryny Jabłonskaj. Fota z Threads
U kamientaryjach ludzi padzialilisia svaimi znachodkami na Kamaroŭcy. Adna žančyna pachvaliłasia, što zmahła znajści ŭ babuli viarhini pa 3 rubli za štuku, chacia ŭsiudy na rynku było pa 5, a ŭ kvietkavaj kramie la jaje doma — ažno pa 9. Jašče adna prademanstravała šykoŭny košyk z kvietkami za 50 rubloŭ.