Kazachstanski «Kajrat» z dvuma biełarusami prabiŭsia ŭ asnoŭny raŭnd Lihi čempijonaŭ
U matčy płej-of kvalifikacyi kłub z Ałmaty pa sumie dvuch matčaŭ adoleŭ šatłandski «Sełtyk».
Fota: Craig Williamson/SNS Group via Getty Images
Tydzień tamu matč u Hłazha skončyŭsia ź likam 0:0. Učora ŭ Ałmaty asnoŭny i dadatkovy čas taksama zaviaršyŭsia 0:0.
I ŭsio vyrašyłasia ŭ sieryi pienalci, dzie hałkipier «Kajrata» 21-hadovy Temirłan Anarbiekaŭ adbiŭ try pienalci ź piaci.
Za kazachstanski kłub vystupaje dvoje biełarusaŭ: kapitan kłuba Alaksandr Martynovič i Valer Hramyka. Hramyka ŭ sieryi 11-mietrovych prabiŭ u pierakładzinu, a Martynovič nie schibiŭ.
A Martynovič, jakomu ŭčora spoŭniłasia 38, paśla matča pažartavaŭ: «Tak, mabyć, heta najlepšy padarunak na dzień naradžeńnia! Usia kamanda — małajcy. Zmahalisia na praciahu abodvuch pajadynkaŭ i zasłužyli vychad u nastupny raŭnd. U sieryi pienalci taksama atrymałasia, jak i zadumali. Chaj Valera Hramyka i ŭdaryŭ u pierakładzinu, ale trapiŭ u jaje ŭpeŭniena!»
Apošnija čatyry ŭdzielniki Lihi čempijonaŭ vyznačacca siońnia, a ŭ čaćvier projdzie losavańnie asnoŭnaj stadyi. Jak i hod tamu, jano adbudziecca pa novaj sistemie, biez zvykłaha padziełu na hrupy, a kožny kłub atrymaje pa vosiem supiernikaŭ.
U kvalifikacyi Lihi čempijonaŭ brała ŭdzieł minskaje «Dynama», jakoje vylecieła ŭ druhim raŭndzie, prajhraŭšy bałharskamu «Łudahorcu», a potym i ź Lihi kanfierencyj, dvojčy sastupiŭšy ałbanskaj «Ehnacii».
U jeŭrakubkach zastaŭsia tolki «Nioman». Zaŭtra ŭ płej-of kvalifikacyi Lihi kanfierencyj haradziency zhulajuć ź ispanskaj «Raja Valjekana» (pieršy matč 0:1 na karyść ispancaŭ).