«Heta hučyć horda i statusna». Rektar Biełaruskaha dziaržaŭnaha ŭniviersiteta zamiežnych moŭ pra pierajmienavańnie VNU
Minski dziaržaŭny linhvistyčny ŭniviersitet byŭ pierajmienavany ŭ Biełaruski dziaržaŭny ŭniviersitet zamiežnych moŭ (BDUZM) tolki ŭ žniŭni hetaha hoda paśla taho, jak Łukašenka źviarnuŭ na «maciernaść» nazvy.
Novy nadpis na ŭniviersitecie. Fota: Kakabaj
«Aficyjnaje pryznańnie ŭniviersiteta jak Biełaruskaha dziaržaŭnaha ŭniviersiteta zamiežnych moŭ — vielmi važny momant u historyi VNU. Heta hučyć horda i bolš statusna», — ličyć rektarka Natalla Łapcieva.
Jana dadała, što ŭniviersitet doŭha išoŭ da hetaha zvańnia.
«Stać «biełaruskim» univiersitetam — heta aznačaje dasiahać vysokaj efiektyŭnaści i jakaści ŭ adpaviednaści z patrabavańniami raźvićcia sistemy adukacyi, — skazała rektar. — Za svaje 77 hadoŭ univiersitet prajšoŭ vielizarny šlach i šmat krokaŭ, kab siońnia zasłužana nasić hetaje imia i status, paćviardžajučy svoj uzrovień jak viadučaj ustanovy ŭ moŭnaj adukacyi krainy».
Hetaje pierajmienavańnie vidavočna źviazana z tym, što ŭ listapadzie 2024 hoda na «prablemu» źviarnuŭ uvahu Łukašenka, jaki nazvaŭ nazvu Minski dziaržaŭny linhvistyčny ŭniviersitet «maciernaj».
Pamiž im i jahonymi čynoŭnikami tady adbyłasia razmova, jakuju pracytavali prapahandysty:
— Byŭ iniaz.
— Byŭ.
— Nu a čaho maciernymi słovami abazvali?
— Heta dakładniej, lepš ci modna było?
— Była takaja moda — pierajmianoŭvać.
— Byŭ instytut — staŭ univiersitet.
— Kali pytajucca darohu, kažuć: dzie MDŁU nie viedajem. A iniaz…
— Heta ž maciernaje słova.
— Jak narhas.
— Ledź nie ŁHBT.
Raniej u Viciebsku pierajmienavali fakultet, nazvu jakoha Łukašenka nazvaŭ «maciernaj».