ZŠA zaćvierdzili prodaž Ukrainie 3 tysiač dalnabojnych rakiet ERAM
Jak paviedamlaje The Wall Street Journal sa spasyłkaj na krynicy, administracyja prezidenta ZŠA Donalda Trampa ŭchvaliła prodaž Ukrainie 3350 avijacyjnych rakiet Extended Range Attack Munition (ERAM). Pastaŭki płanujecca ažyćciavić ciaham prykładna šaści tydniaŭ.
ERAM — heta avijacyjnaja kryłataja rakieta kłasa «pavietra—pavierchnia», pryznačanaja dla paražeńnia naziemnych i marskich celaŭ. Jaje radyus dziejańnia składaje ad 240 da 450 km, a modulnaja kanstrukcyja dazvalaje adaptavać zbroju pad roznyja zadačy.
Pavodle WSJ, pakiet uzbrajeńniaŭ na 850 młn dołaraŭ, pieravažna finansavany jeŭrapiejskimi krainami, byŭ adkładzieny da zaviaršeńnia pieramovaŭ Donalda Trampa z Uładzimiram Pucinym i Uładzimiram Zialenskim. Pry hetym vykarystańnie rakiet ERAM patrabuje dadatkovaha ŭzhadnieńnia ź Pientahonam.
Aficyjna ZŠA pakul nie abviaścili pra novyja pastaŭki hetych rakiet. Adnak adznačajecca, što inšyja ŭzbrajeńni, zakuplenyja jeŭrapiejskimi krainami ŭ ZŠA, mohuć uzmacnić abaronu Ukrainy ŭ miežach jaje terytoryi. U pryvatnaści, havorka idzie pra sistemy supraćpavietranaj abarony i reaktyŭnyja sistemy załpavaha ahniu GMLRS z dalnaściu da 145 km.