«Abutak dla sapraŭdnych patryjotaŭ»: biełaruskaja fabryka robić dla školnikaŭ boty z čyrvona-zialonymi šnurkami
Kažuć, taki abutak idealna pasuje dla vučniaŭ vajskova-patryjatyčnych kłasaŭ. A vypuskaje jaho fabryka, jakaja šyje boty dla vajskoŭcaŭ i śpiecsłužbaŭ.
Tut i dalej skrynšoty instahrama fabryki «Čaŭlar»
Pierad pačatkam navučalnaha hoda biełaruskaja fabryka «Čaŭlar» aktyŭna rekłamuje svaju navinku — «patryjatyčnyja» boty. Śćviardžajecca, što raspracavana kalekcyja była śpiecyjalna dla vučniaŭ vajskova-patryjatyčnych kłasaŭ i kłubaŭ. Ale ž u instahramie vytvorca chvalicca, što padydzie taki abutak pad luby styl i nasić jaho moža luby školnik.
Hałoŭnaja asablivaść botaŭ — čyrvona-zialonyja šnurki dy ŭšytyja dzie-nidzie minijaciurnyja ściažki. Rekłamujuć ich z maksimalnym pafasam: «Madeli dla tych, chto nie čakaje, a robić. Chto šanuje dyscyplinu i idzie da mety — krok za krokam».
Dyzajnierka, jakaja pracavała nad takim śpiecyfičnym abutkam, — Alena Sobal. Jana kaža, ideja stvaryć kalekcyju źjaviłasia ŭ jaje padčas tematyčnaj vystavy.
Dyzajnierka Alena Sobal
— Da nas na stend padychodzili dzieci z vajskova-patryjatyčnych kłasaŭ, kłubaŭ. Jany byli ŭ formie, ale ŭ krasoŭkach. Dla mianie jak dyzajnierki heta niejki stylistyčny pravał, reža voka. Ja zrazumieła, što naša pradpryjemstva ŭžo 29 hadoŭ vypuskaje abutak dla vajskoŭcaŭ, śpiecsłužbaŭ, dla turyzmu, vandrovak — i my možam zrabić taki abutak dla dziaciej. Było vidavočna, što hetym dzieciam zamiest krasovak treba narmalny abutak, jaki adpaviadaje stylu.
Dyzajnierka śćviardžaje, što fabryka vykarystoŭvaje vyklučna naturalnuju skuru i siertyfikavanyja materyjały.
— Padešva znosaŭstojlivaja, marozaŭstojlivaja. Dziciaci budzie zručna i na paradach, i na treniroŭkach, i ŭ niejkich ekstremalnych umovach.
Pakul u firmovaj kramie pradstaŭlena ŭsiaho 5-6 madelaŭ, ale abiacajuć, što źjaviacca jašče varyjanty. Nazvy botaŭ uražvajuć: «Vajpier», «Kobra», «Manhust». Jość navat «AMAP».
Kaštuje «patryjatyčny» abutak nie skazać, kab vielmi tanna — niedzie ad 140 da 180 rubloŭ.
Čytajcie taksama:
Kolki ŭ Biełarusi kaštujuć tabi — modny abutak, jaki šmat u kaho asacyjujecca z kapytami