Chłopiec paskardziŭsia, što praz kałaps na miažy nie moža vyjechać z Varšavy ŭ Minsk. Biełarusy padzialilisia łajfchakami
Z-za vializnych čerhaŭ na vyjeździe ź Biełarusi ŭ Polšču ŭ aŭtobusnych pieravozčykaŭ źbilisia hrafiki. Niekatoryja spaźniajucca, a inšyja admianiajuć rejsy. Ale biełarusy šukajuć i znachodziać varyjanty vyjścia, piša BGmedia.
Na što paskardziŭsia ŭ videa biełarus
Biełarus Pavieł Šumski źniaŭ videa na vakzale Varšava-Zachodnia pozna ŭviečary 19 žniŭnia. Jon pryjechaŭ ź dziaŭčynaj da 23.00. Tym časam pavinien byŭ adpravicca aŭtobus na Minsk, na jaki jany kupili kvitki. Ale jon nie pryjechaŭ.
Chłopiec parazmaŭlaŭ ź inšymi ludźmi na vakzale, jakija taksama čakali svaich aŭtobusaŭ. Naprykład, da 23 hadzin prybyŭ aŭtobus, jaki pavinien byŭ pryjechać da 18 hadzin. Padčas zapisu videa źjaviŭsia aŭtobus da Hrodna. Jon spaźniŭsia prykładna na siem hadzin.
«A naš aŭtobus moža zaŭtra pryjści ŭ taki ž čas, na sutki pieranos. My voś tak siadzim, čakajem, nie možam hatel źniać, tamu što nam treba pilnavać naš aŭtobus. Ja nie viedaju, kolki my budziem siadzieć i čakać tut. Tolki što adpravilisia čatyry aŭtobusy, tut była bieźlič ludziej, pracisnucca nie było kudy. Nie viedaju, kolki budziem stajać. My stamilisia ŭžo biehać da kožnaha aŭtobusa, štuk piać prapuścili, kožny raz dumali, što heta naš aŭtobus», — apisaŭ situacyju biełarus.
U kolki jon u vyniku źjechaŭ z Varšavy, nieviadoma. U kamientarach pad jaho videa dziaŭčyna napisała, što hety aŭtobus adpraviŭsia ŭ Minsk a 7-j ranicy. Situacyja była napružanaja, «treba było jašče pazmahacca za svajo miesca». A dniom 20 žniŭnia biełarus apublikavaŭ videa, jak vyjazdžaje z punkta propusku «Brest» u Biełaruś. Tam jon pakazaŭ aŭtobusy, jakija nazapasilisia ŭ čarzie.
Pieršaje videa nabrała ŭ TikTok bolš za 600 kamientaroŭ. Niekatoryja napisali, što taksama sutyknulisia z prablemaj spaźnieńnia aŭtobusaŭ. A ŭ niekatorych ich uvohule admianili:
- «U nas byŭ aŭtobus na 14.00, jaho admianili ŭvohule. Nastupny byŭ u 23.00 viečara».
- «Učora z Varšavy-Zachodniaj vyjezd u 16.30. Aŭtobus pryjechaŭ u 20.00, praz hadzinu budu ŭ Minsku. Ciarpieńnia».
Taksama ŭ kamientarach biełarusy padzialilisia łajfchakam, jak chutka dabracca dadomu.
Jany paraili ŭsim, chto čakaje aŭtobusaŭ, jakija spaźnilisia na vakzale, kuplać bilet na ciahnik Varšava — Terespal. Pa pryjedzie na vakzale ŭžo stajać miascovyja aŭtobusy, jakija jeździać tolki z Terespala ŭ Brest. Ich adpraŭleńnie sinchranizavana z prybyćciom ciahnika z Varšavy.
Jość i druhi varyjant: na taksi ad čyhunačnaha vakzała ŭ Terespali dajechać da punkta propusku «Terespal», a tam šukać u čarzie aŭtobus, u jaki možna padsieści za hrošy.
Treba ŭličvać, što ciahniki z Varšavy ŭ Terespal jeździać šeść razoŭ u dzień. Pieršy adpraŭlajecca ŭ 07.27, apošni — u 21.20. Adpraŭlajucca jany z roznych čyhunačnych vakzałaŭ Varšavy. Aktualny raskład možna daviedacca na sajcie polskaha pieravozčyka PKP Intertcity.
Voś historyi i parady biełarusaŭ, jakija jany napisali pad videa chłopca:
- «Niama na miažy [Polščy ź Biełaruśsiu] nivodnaha aŭtobusa, tamu nie treba brać kvitok. Pieršy aŭtobus pryjazdžaje [da šłahbauma], kuplaješ bilet u kiroŭcy i jedzieš u bok RB, niama nijakich prablem. A kali vy nie možacie zdać kvitki i marynujeciesia, to heta vaša pamyłka, užo byli b doma. Ja tak zaŭsiody jezdžu, ale bilet nikoli nie kuplaju ŭ kasie».
- «Navošta čakać? Ciahnikom da Terespala, tam na taksi na pierachod i na padsadku ŭ pieršyja aŭtobusy».
- «Rašeńnie prostaje: da Terespala ciahnikom. Tam na miažy na padsadku: albo aŭtobus, albo mašyna. Viadoma, buduć zatrymki, kali na miažy ŭ Polšču staić 150 aŭtobusaŭ».
- «A što, inšaha transpartu niama? Ja sieła ŭ elektryčku da Terespala ŭ 07.00, prybyła ŭ Terespal u 09.20 i adrazu byŭ tam aŭtobus na Brest. I ŭ nas zaniało ad Varšavy da Bresta piać hadzin».
- «Davožu da vašaha viedama. Tam aŭtobusy chodziać nie tolki z Varšavy: z Terespala, ź Siedlicy. Dy i na varšaŭski naŭrad ci vy siadziecie, vas naŭrad ci voźmuć, ci za bilet zachočuć, jak z Varšavy. Nie chvalujciesia, tam chapaje aŭtobusaŭ».
- «Ja padychodziła da kožnaha prydatnaha aŭtobusa i pytałasia volnaje miesca, na čaćviorty aŭtobus mianie ŭziali za 50 jeŭra. Moj nabyty bilet na aŭtobus, jaki zatrymali, zmarnavaŭsia».