«Voś taki cyrk». U Babrujsku pa daviedku ad akulista ludzi stajać u čarzie ŭ optyku

Žychar Babrujska vykłaŭ u tyktok videa doŭhaj čarhi ŭ optyku. Akazvajecca, ludzi stajać nie pa źnižku ci niešta z rasprodažu. Heta čarha da aftalmołaha — bo ŭ horadzie nie chapaje daktaroŭ, piša «Lusterka».

Čarha kala ŭvachodu ŭ sałon «Luks Optyka» u Babrujsku, žnivień 2025 hoda. Skrynšot: videa tiktok.com/@vasilich

Na kadrach vidać, jak u soniečny dzień kala ŭvachodu ŭ sałon «Luks optyka» na vulicy Mienskaj u Babrujsku staić čarha z bolš čym dziasiatka čałaviek.

«Voś taki voś cyrk zładzili ludzi. A pałovie vośmaj ranicy zajmajuć čarhu ŭ «Optyku», kab uziać daviedačku dziciaci ŭ škołu. U paliklinicy niama akulistaŭ», — kamientuje mužčyna za kadram.

@vasilich__._ Spravka u okulista #chočuvtop #chočuvriekomiendacii #okulist #škoła ♬ orihinalnyj zvuk - vasilich__._

Sapraŭdy, niekatoryja pryvatnyja kramy optyki prapanujuć płatnuju pasłuhu pa praviercy zroku i vydačy daviedak dla navučalnych ustanoŭ.

Naprykład, u adnoj ź sietak sałonaŭ, jakija pracujuć u Minsku i inšych haradach, košt vypisvańnia daviedki z dyjahnostykaj i aftalmaskapijaj składaje 40 rubloŭ. Ale čamu hetuju pasłuhu stała prablematyčna atrymać biaspłatna ŭ dziaržaŭnaj paliklinicy?

Kab vyśvietlić heta, žurnalist «Lusterka» pad vyhladam zaniepakojenaha baćki patelefanavaŭ na haračuju liniju Babrujskaj centralnaj balnicy. Mienavita jana kiruje ŭstanovami achovy zdaroŭja horada.

Na pytańnie, čamu ludzi vymušanyja źviartacca ŭ pryvatnyja optyki i ci budzie takaja daviedka sapraŭdnaja dla škoły, u balnicy adkazali, što pryčyna — u niedachopie kadraŭ.

«Śpiecyjalistaŭ u nas, na žal, nie chapaje. Ale heta nie tolki ŭ našym horadzie, takaja situacyja ŭ cełym [u Biełarusi], — adkazała dziažurnaja. — Kali ŭ kramach optyki pravodziać paŭnavartasny ahlad, a nie prosta praviarajuć vastryniu zroku, to tady tak, [daviedka adtul ] padychodzić».

Pry hetym jašče 15 žniŭnia zahadčyca Babrujskaj haradskoj dziciačaj palikliniki № 4 Kaciaryna Šmakava ŭ kamientary dla telehram-kanała «Hovorit i pokazyvajet Bobrujsk» zapeŭnivała, što prablem z dostupam da doktara niama:

«U nas robicca pryjom dziaciej dziciačym doktaram-aftalmołaham. Zapisacca možna napramuju praz rehistraturu, telefon ci sajt».

Žurnalist «Lusterka», taksama pradstaviŭšysia baćkam, patelefanavaŭ u rehistraturu hetaj palikliniki, kab zapisać dzicia na pryjom. Adnak pra anłajn-zapis abo braniravańnie času pa telefonie havorki nie viałosia.

— Dziciaci na ahlad aftalmołaha dla daviedki ŭ škołu kali možna zapisać? — spytaŭ žurnalist.

— Možacie pryjści zaŭtra z 12.00 da 13.00 pa čarzie abo ŭ paniadziełak z 16.00 da 18.00 padyści, — adkazała supracoŭnica rehistratury.

— Tolki pa žyvoj čarzie? A zapisacca zahadzia nielha?

— Tak, tolki pa žyvoj. 

Kamientary da artykuła