«Takoha ŭ Minsku bolš niama». Za prava kupić kvateru ŭ hetym domie ludzi zapłacili 7 tysiač rubloŭ
Rynak nieruchomaści Minska pabačyŭ usialakaje: i načlehi pad dźviaryma zabudoŭščykaŭ, i čerhi za niatannymi mietrami. Ale žyły kompleks «Paŭnočny bierah» niadaŭna ździviŭ. Siońnia tut adbudziecca start prodažaŭ novabudoŭli Lake Views, jakaja krasujecca na pieršaj bierahavoj linii. Jana pazicyjanujecca jak ultrapremium, adpaviedna, mietr u joj budzie vielmi darahim. Dla taho kab tolki pryjści i ahledzieć kvatery, ludzi ŭnosili depazit — 7 tysiač rubloŭ. Što ž u hetym abjekcie takoha asablivaha, piša Onliner.
«Heta nie prosta premium, heta ultrapremium»
Lake Views — heta try roznaŭzroŭnievyja słupki vyšynioj ad 6 da 8 pavierchaŭ, jakija litaralna stajać na bierazie Cnianskaha vadaschovišča. Jany abjadnany styłabatam, a try padjezdy nazvanyja adpaviedna Lake Views 1, Lake Views 2 i Lake Views 3. Adras novabudoŭli: vulica Ćvirki, 88.
Pieršaja asablivaść doma bačnaja z adnaho tolki pozirku na jaho: jon całkam hatovy. Heta značyć pakupnikam nie treba ŭstupać u budaŭnictva, uschvalavana sačyć za źjaŭleńniem pavierchaŭ i pakutliva čakać atrymańnia klučoŭ. Abjekt užo pabudavali, uviali ŭ ekspłuatacyju, a terytoryju zvonku dobraŭparadkavali łandšaftnym dyzajnam.
Heta pieršaja hatovaja novabudoŭla na pieršaj bierahavoj linii. Jašče adna aktyŭna raście pobač. Ziamla pad astatnija damy pakul jašče čystaja, ale chutka na joj taksama razhorniecca budaŭnictva. Całkam zaviaršyć samyja darahija abjekty, jakija prymykajuć da vadaschovišča, płanujecca ŭ 2027 hodzie. U «Paŭnočnym bierazie» ich pazicyjanujuć kalekcyjnymi i ultrapremijalnymi.
— Damy na pieršaj bierahavoj linii — heta kalekcyjnaja nieruchomaść, pakupniki jakoj buduć hanarycca svaim nabyćciom, — padkreślivaje načalnik adździeła markietynhu «Paŭnočnaha bieraha» Łarysa Fišman.
Lake Views znachodzicca ŭ horadzie, ale pry hetym staić prosta kala vadajoma. Dom maje siaredniuju paviarchovaść. Naprykład, na praśpiekcie Pieramožcaŭ taksama jość budynki ź vidam na vadaschovišča, ale jany ŭsie vyšynnyja. Dvaravaja terytoryja raźmiaściłasia na styłabacie, što zabiaśpiečvaje žycharam maksimalnuju pryvatnaść. Parkinh znachodzicca ŭ domie, u kožnaj kvatery jość svajo mašyna-miesca.
Łobi miescy ahulnaha karystańnia
Uvachod u padjezd vyhladaje modna, a trapić unutr možna z dapamohaj FaceID, mabilnaha dadatku abo pin-koda. Dadatak šmatfunkcyjanalny — u im, naprykład, možna hladzieć tranślacyju z kamier videanazirańnia, jakija tut našpihavanyja paŭsiul.
Łobi davoli śvietłaje i prastornaje. Jaho aformili ŭ styli sučasnaj kłasiki.
— U afarmleńni vykarystanyja naturalnyja materyjały, — adznačaje Łarysa Fišman. — Źviarnicie ŭvahu na kolkaść dekoru. Łobi vyhladaje jak tvor mastactva, u tym liku tamu my nazyvajem damy kalekcyjnymi.
Na pieršym paviersie jość kalasačnaja, łapamyjka, sanvuzieł, a taksama piersanalnyja kładoŭki, jakija iduć u padarunak pry kupli kvatery.
Styłabat słužyć dvarovaj terytoryjaj i zonaj adpačynku, kudy mohuć trapić tolki žychary, a ŭsim astatnim uvachod stroha zabaronieny. Na im ustalavali zonu barbiekiu, dobraŭparadkavali zialonyja zony z łaŭkami, pastavili dźvie dziciačyja placoŭki — dla dziaciej starejšych i małodšych. Dla poŭnaha ščaścia nie chapaje tolki basiejna — u lepšych tradycyjach dubajskaj nieruchomaści. Ale biełaruskaje nadvorje nie dazvalaje mieć takoje dabro. Pa vodnyja pracedury i sport žychary buduć chadzić u susiednija damy, u jakich užo pracuje trenažornaja zała, a paźniej źjavicca spa-centr.
Na pieršym paviersie doma jość kvatery z terasami. Z adnaho boku jany vychodziać na vulicu i park, a ź inšaha — prosta na styłabat.
Pad styłabatam, heta značyć faktyčna na ŭzroŭni ziamli, raźmiaścili parkinh. Numary mašyn pry ŭjeździe sčytvajucca aŭtamatyčna. Na kožnuju kvateru tut prypadaje adno mašyna-miesca, košt jakoha ŭžo ŭklučany ŭ kančatkovuju canu žylla. Heta značyć admovicca ad mašyna-miesca nielha.
Minusam možna nazvać adsutnaść zaradak dla elektrakaraŭ.
Havoračy pra transpart, nielha nie ŭspomnić niadaŭniuju navinu pra toje, što, nasupierak čakańniam pakupnikoŭ, da «Paŭnočnaha bieraha» mietro nie dojdzie.
— My ličym, što transpartnaja dastupnaść rajona ŭsio roŭna budzie vielmi dobraja. Treba pryznacca, što pieravažnaja bolšaść našych klijentaŭ pierasoŭvajecca na mašynach. Mnohija ź ich ličać mietro bolš niedachopam, čym vartaściu. Tut zručny vyjezd na MKAD, a ŭsia transpartnaja infrastruktura rajona pradumana z ulikam patreb hetaha rajona. Tamu my absalutna spakojna pastavilisia da hetaj infarmacyi.
U kožnym słupku žycharoŭ budzie absłuhoŭvać usiaho adzin lift kitajskaj firmy Sjec. Z ulikam małoj kolkaści kvater na pavierchach adnaho lifta pavinna być dastatkova. Liftavuju šachtu ahinaje leśvica z davoli prastornymi leśvičnymi placoŭkami.
Kvatery znutry i krajavid z voknaŭ
Usiaho ŭ novabudoŭli 79 kvater roznaj płoščy. Na kožnym paviersie — pa 4 kvatery. Dźviery, darečy, biełaruskija, ale ź italjanskaj furnituraj.
Pakazvać płaniroŭki i azdableńnie kvater stroha zabaranili — hetaja infarmacyja stanie dastupnaja tolki patencyjnym pakupnikam. Viadoma, što jość jak studyi, tak i žyllo paprastorniej. A voś pientchaŭsy na apošnich pavierchach nie praduhledžany. Płaniroŭka kvater svabodnaja, kanstrukcyjna adździelenyja tolki sanvuzły. Vokny ŭ padłohu aluminijevyja, z šumaizalacyjaj.
Krajavidy — adzin z samych vialikich plusaŭ novabudoŭli. Jany tut sapraŭdy cudoŭnyja. Pakolki hetaja terytoryja Minska doŭhi čas była svabodnaj ad žylla, ahledzieć Cnianskaje vadaschovišča z vyšyni było paprostu niemahčyma.
— Vokny vychodziać na Cnianskaje vadaschovišča, Lakeside Park. Źviarnicie ŭvahu, nakolki vialikuju zialonuju terytoryju achoplivaje hety vid. Heta ŭnikalny dla Minska łandšaft. Tut vy faktyčna žyviacie la ŭvachodu ŭ park.
I pahladzicie, jak blizka dom znachodzicca da vady. Litaralna 50 mietraŭ — i pačynajecca vada.
U kožnaj kvatery jość jak minimum adzin bałkon. Jany nievialikija, ale miesca dastatkova dla stolika i pary siadzieńniaŭ. Na bałkonie staić «skrynka» dla kandycyjaniera, vierchniuju častku jakoj možna zastavić kvietkami.
Što nakont absłuhoŭvańnia ŭsioj hetaj pryhažości paśla pieradačy klučoŭ? Bo viadoma, što premijalnaja nieruchomaść — heta jašče i premijalnaje absłuhoŭvańnie. Łarysa Fišman adkazvaje:
— U «Paŭnočnym bierazie» jość svaja kirujučaja arhanizacyja. Jana dosyć vialikaja. Pasłuhi akazvajucca 24/7. U luby čas dnia i nočy vy možacie pahavaryć sa śpiecyjalistami, vyklikać kahości dla ekstranaha vyrašeńnia pytańniaŭ.
«Žyllo tut budzie kaštavać dosyć vialikich hrošaj»
Prodažy kvater pačnucca 21 žniŭnia. U łobi źbiarucca ludzi, jakija nie paškadavali ŭnieści depazit u 7 tysiač rubloŭ. Bolš za toje, načalnik adździeła prodažaŭ pierakonvaje: niahledziačy na ŭmovu, popyt byŭ vielmi vysoki.
— Biezumoŭna, my sutyknulisia z roznymi typami reakcyj, ale ludzi, jakija sapraŭdy zacikaŭlenyja, razumiejuć pryčynu, pa jakoj my tak zrabili. Ich heta całkam zadavalniaje. Depazit budzie viernuty tym, chto admovicca ad pakupki. U advarotnym vypadku jon pojdzie ŭ lik koštu žylla.
Historyja z depazitami nie novaja. Heta dubajskaja stratehija. Jana zabiaśpiečvaje zakrytyja prodažy i mahčymaść rehulavać kolkaść ludziej, a taksama filtravać tych, chto sapraŭdy hatovy da pakupki.
My nie skažam, kolki ludziej zapisałasia, ale ich bolš, čym kvater u domie. My ŭpeŭnienyja, što zaŭtra ŭsie kvatery buduć pradadzienyja.
Košt žylla taksama trymajecca ŭ sakrecie, ale adznačajecca, što budzie doraha. Košt mietra zaležyć ad troch faktaraŭ: pavierch, vid z akna i płaniroŭka.
— Heta ŭnikalnyja kalekcyjnyja kvatery, tamu košt budzie adpaviedny. Ludzi ŭnosili depazity, majučy ŭjaŭleńnie pra toje, što žyllo tut budzie kaštavać dosyć vialikich hrošaj.