Ukraina prapanavała ZŠA ździełku pa pastaŭkach zbroi na $100 miljardaŭ i admoviłasia ad terytaryjalnych sastupak Rasii
Ukraina prapanavała ZŠA zakupić amierykanskuju zbroju na $100 młrd, jakuju prafinansuje Jeŭropa. Heta stanie častkaj harantyj biaśpieki paśla mirnaha ŭrehulavańnia z Rasijaj. Ab hetym paviedamlaje Financial Times sa spasyłkaju na dakumienty, u jakich vykładzieny prapanovy Kijeva prezidentu ZŠA na sustrečy ŭ Biełym domie.
Prezident Donald Tramp vitaje prezidenta Ukrainy Uładzimira Zialenskaha pa prybyćci ŭ Bieły dom u paniadziełak, 18 žniŭnia 2025 h., u Vašynhtonie. Fota: AP Photo / Alex Brandon
Pavodle dakumienta, ź jakim aznajomiłasia Financial Times, Ukraina paabiacała ZŠA zakupić amierykanskuju zbroju na $100 młrd ź finansavaj dapamohaj Jeŭropy ŭ ramkach ździełki pa atrymańni harantyj biaśpieki ZŠA.
Akramia taho, Kijeŭ i Vašynhton zaklučać ździełku na $50 młrd pa vytvorčaści bieśpiłotnikaŭ ukrainskimi kampanijami.
U dakumiencie nie ŭkazana, jakuju mienavita zbroju Ukraina prosić zakupić u ramkach ździełki, ale Kijeŭ jasna daŭ zrazumieć, što choča nabyć jak minimum 10 sistem supraćpavietranaj abarony Patriot amierykanskaj vytvorčaści dla abarony svaich haradoŭ i krytyčna važnaj infrastruktury, a taksama inšyja rakiety i abstalavańnie.
Kijeŭ nie prymie nijakich pahadnieńniaŭ, što praduhledžvajuć terytaryjalnyja sastupki na karyść Rasii, i nastojvaje na spynieńni ahniu ŭ jakaści pieršaha kroku da poŭnaha mirnaha pahadnieńnia, havorycca ŭ dakumiencie, składzienym uładami Ukrainy.
Zhodna z dakumientam, Kijeŭ taksama adchilaje prapanovu Pucina, zroblenuju Trampu na Alascy, ab zamarozcy astatniaj linii frontu, kali Ukraina vyviedzie vojski z uschodnich rehijonaŭ — Danieckaj i Łuhanskaj abłaściej.
Heta stvoryć «płacdarm dla dalejšaha i chutkaha prasoŭvańnia rasijskich vojsk u napramku Dniapra» i dazvolić Pucinu «dasiahnuć metaŭ ahresii inšymi srodkami», havorycca ŭ dakumiencie.
Zhodna z dakumientam, Ukraina ličyć, što sproba Rasii vyrašyć terytaryjalnyja pytańni da pačatku dalejšych pieramoŭ ab doŭhaterminovym mirnym pahadnieńni pryviadzie da taho, što situacyja na miescach budzie raźvivacca pa pryncypie «zavieršanaha faktu», pry hetym ničoha nie budzie zroblena dla zabieśpiačeńnia budučaj biaśpieki Kijeva.
Kijeŭ taksama nastojvaje na pradastaŭleńni jamu poŭnaj kampiensacyi ad Rasii za škodu padčas vajny, jakaja patencyjna moža być apłačanaja za košt rasijskich aktyvaŭ na sumu 300 miljardaŭ dołaraŭ, zamarožanych u zachodnich krainach. Luboje pasłableńnie sankcyj pavinna być pradastaŭlena tolki ŭ tym vypadku, kali Rasija vykonvaje budučaje mirnaje pahadnieńnie i «pavodzić siabie sumlenna», dadajecca ŭ dakumiencie.