«Uitkaf nie viedaje, pra što kaža». Śpiecpasłańnik Trampa niapravilna zrazumieŭ Pucina — Kreml usio jašče choča atrymać čatyry ŭkrainskija vobłaści

Uładzimir Pucin pa‑raniejšamu choča całkam kantralavać Danieckuju, Łuhanskuju, Zaparožskuju i Chiersonskuju vobłaści. Jon prapanavaŭ tolki častkovaje spynieńnie ahniu — admovu ad udaraŭ pa enierhietyčnaj infrastruktury i bujnych haradach u tyle. Ale nie ŭsieahulnaje spynieńnie ahniu, kažuć krynicy Bild.

Contributor / Getty Images

ZŠA ž, naadvarot, prapanavali zamarozić kanflikt pa biahučaj linii frontu ŭ abmien na šyrokaje źniaćcie sankcyj i novyja ekanamičnyja pahadnieńni z Rasijaj. Pavodle infarmacyi Bild, Kreml na hetuju prapanovu iści nie zachacieŭ.

Bolš za toje, śpiecpasłańnik ZŠA Styv Uitkaf niapravilna zrazumieŭ zajavy Pucina i pryniaŭ ich za sastupku. Tak, zapatrabavany Rasijaj «mirny adstup ukraincaŭ» z Chiersona i Zaparožža jon zrazumieŭ jak prapanovu «mirnaha adstupleńnia» rasijan z hetych rehijonaŭ.

«Uitkaf nie viedaje, pra što kaža», — zajaviŭ ukrainski ŭradavy čynoŭnik u razmovie z Bild. Pavodle infarmacyi redakcyi, takuju acenku padzialajuć i pradstaŭniki niamieckaha ŭrada.

Uviečary 7 lipienia, jak stała viadoma Bild, adbyłasia telefonnaja kanfierencyja pamiž ZŠA — a mienavita śpiecpasłańnikam Uitkafam, dziaržsakratarom Marka Rubia i vice-prezidentam Džej Dzi Vensam — i jeŭrapiejskimi partniorami.

U jeŭrapiejcaŭ skłałasia ŭražańnie, što amierykancy jašče sami nie pryjšli da adzinaha razumieńnia taho, što adbyvajecca. Heta było źviazana pierš za ŭsio z Uitkafam, čyje zajavy pra jaho razmovu z Pucinym u Kramli byli ŭspryniaty jak błytanyja. Jeŭrapiejcam jon zdaŭsia pierahružanym i małakvalifikavanym, kali kazaŭ pra terytaryjalnyja pytańni.

Akramia taho, vidavočna, što pamiž Uitkafam i Rubia isnujuć razychodžańni nakont roli Jeŭropy. Dziaržsakratar padkreślivaŭ, što jeŭrapiejcy pavinny być uciahnuty ŭ pieramoŭny praces, u tym časie jak Vens i Uitkaf chacieli tolki infarmavać Jeŭropu ab vynikach dalejšych krokaŭ Trampa.

Kamientary da artykuła