Bolš za 10 tysiač hatelaŭ padajuć u sud na Booking.com z-za jaho cenavaj palityki
Bolš za 10 tysiač hatelaŭ padali hrupavy pazoŭ suprać płatformy Booking.com. Na ich dumku, jana 20 hadoŭ naviazvała im stratnyja ŭmovy: hatelam nie dazvalałasia prapanoŭvać numary na ŭłasnych sajtach tańniej, čym na Booking.com, piša Bi-bi-si.
Fota: Jonathan Raa/NurPhoto via Getty Images
Palityku «najlepšaj cany», jakaja dziejničała na płatformie z 2004 pa 2024 hod, Jeŭrapiejski sud pryznaŭ parušeńniem antymanapolnaha zakanadaŭstva, paśla čaho Booking.com admoviŭsia ad hetaj praktyki. Pastanova suda stała padstavaj dla pazovu z boku haścinic, jakija chočuć atrymać kampiensacyju strat za 20 hadoŭ.
Sudovy praces inicyjavała Asacyjacyja hatelaŭ, restaranaŭ i kafe Jeŭropy (Hotrec). Pazoŭ padtrymali bolš za 10 000 haścinic i 30 nacyjanalnych asacyjacyj hateljeraŭ. Z-za vysokaj cikavaści jana padoŭžyła termin rehistracyi dla ŭładalnikaŭ haścinic, jakija chočuć dałučycca da pazovu — heta možna zrabić da 29 žniŭnia. Čakajecca, što heta budzie adzin z najbujniejšych sudovych pracesaŭ u historyi jeŭrapiejskaj haściničnaj haliny.
«Vodhuk demanstruje mocnaje žadańnie haściničnaha biźniesu supraćstajać niesumlennym praktykam na ličbavym rynku», — havorycca ŭ zajavie Hotrec.
Jak ličać hateljery, płatforma zmahałasia z «bieźbiletnikami»: klijentami, jakija vykarystoŭvajuć Booking.com dla pošuku hatela, ale zatym branirujuć napramuju praz administracyju, abminajučy płatformu. Tamu kampanija abaviazvała haścinicy prapanoŭvać «lepšyja ceny» mienavita na Booking.com.
Booking.com nazvaŭ zajavy Hotrec i inšych asacyjacyj hatelaŭ «niapravilnymi i ŭvodziačymi ŭ zman», dadaŭšy, što nie atrymlivaŭ «aficyjnaha apaviaščeńnia ab hrupavym pazovie». Zajavu płatformy hazieta Guardian atrymała pa elektronnaj pošcie.
Pa mierkavańni kampanii, rašeńnie suda nie nazvała antykankurentnaj samu palityku «najlepšaj cany», a tolki adznačyła, što takija ŭmovy padpadajuć pad dziejańnie antymanapolnaha zakanadaŭstva ES, i ich upłyŭ pavinien aceńvacca ŭ kožnym vypadku asobna. Booking.com ličyć, što «parytetnyja ŭmovy ŭ minułym spryjali kankurentnamu cenaŭtvareńniu, a nie abmiažoŭvali jaho». Kampanija spasyłajecca na dadzienyja apytańnia, zhodna ź jakimi 74% hateljeraŭ zajavili, što Booking.com zrabiŭ ich biźnies bolš prybytkovym. Šmat chto adznačyŭ pavieličeńnie zapaŭnialnaści numaroŭ i skaračeńnie vydatkaŭ na pryciahnieńnie klijentaŭ.
Adnak inšyja pradstaŭniki haliny z hetym nie zhodnyja.
Jak adznačyła prezident haściničnaha padraździaleńnia francuzskaj halinavaj asacyjacyi Umih Vieronik Zihiel u intervju France Inter, atrymaŭšy kantrol nad rynkam, Booking pavysiŭ kamisiju, i heta paŭpłyvała na rentabielnaść haścinic.
«Z 100 jeŭra, jakija płacić klijent, paśla vyliku kamisii Booking hateljer atrymlivaje ŭ lepšym vypadku 75 jeŭra, ź jakich jon pavinien płacić zarobki supracoŭnikam i inviestavać», — kaža jana.
Daśledavańnie Hotrec i Univiersiteta prykładnych navuk i mastactvaŭ Zachodniaj Šviejcaryi pakazała, što ŭ 2024 hodzie chołdynh Booking, maciarynskaja kampanija sajta, kantralavaŭ 71% jeŭrapiejskaha rynku. Košt karparacyi składaje 170 miljardaŭ dołaraŭ, što ŭ try razy bolš za košt Volkswagen.
Rupprecht Podšun, prafiesar kankurentnaha prava z Diusieldorfskaha ŭniviersiteta imia Hienrycha Hiejnie, adznačyŭ u kamientary niamieckamu vydańniu Süddeutsche Zeitung, što sudovy praces, vierahodna, budzie praciahłym i skancentrujecca na składanaj temie acenki strat.
«Sudździam daviadziecca sfarmavać ułasnaje mierkavańnie, a zatym sprava budzie prachodzić usie ŭzroŭni apielacyj — usio heta doraha i z užyvańniem usich jurydyčnych chitrykaŭ», — skazaŭ jon.
Na jaho dumku, Booking.com — kłasičny prykład taho, jak ličbavaja płatforma moža zachapić ceły siektar.
«Heta paŭstańnie haścinic, jakija kažuć: «Vy nie možacie prosta rabić z nami ŭsio, što chočacie»», — kaža jon.
U červieni 2025 hoda kalektyŭny pazoŭ suprać Booking.com padali Fond kalektyŭnych pazovaŭ u śfiery kankurencyi (Consumer Competition Claims Foundation, CCC) i Asacyjacyja spažyŭcoŭ Niderłandaŭ.
Na ich dumku, sajt štučna zavyšaŭ ceny na haścinicy, z-za čaho miljony žycharoŭ Niderłandaŭ pierapłočvali za pražyvańnie. Jany abvinavačvajuć Booking.com u złoŭžyvańni ŭładaj, uviadzieńni klijentaŭ u zman i abmiežavańni sumlennaj kankurencyi. Uspaminalisia «falšyvyja źnižki, niapoŭnyja ceny i štučny deficyt» — a taksama toje, što haścinicy, jakija raźmiaščajuć svaje prapanovy na Booking.com, nie mahli prapanoŭvać nižejšyja ceny ŭ inšych miescach, u vyniku čaho ceny byli zanadta vysokija. Asacyjacyja spažyŭcoŭ aceńvaje ahulnuju škodu ŭ sotni miljonaŭ jeŭra.