Homielskija milicyjaniery vypadkova dadali «ekstremista» ŭ svoj unutrany čat — što jon tam ubačyŭ
Adzin ź biełaruskich aktyvistaŭ, jaki znachodzicca ŭ vymušanaj emihracyi, raspavioŭ «Fłahštoku» ab niezvyčajnym vypadku: jaho vypadkova dadali ŭ čat homielskich milicyjantaŭ. Kala miesiaca jon čytaŭ pierapisku siłavikoŭ i prahladaŭ unutranyja dakumienty, jakija vykładali ŭ čacie.
Heta zakryty čat u Viber, jaki maje nazvu «Sajuz śpiecyjalistaŭ». Ź pierapiski vidać, što ŭ hrupie składajucca supracoŭniki kryminalnaha vyšuku, jakija nie zajmajucca palityčnymi spravami.
U čat vypadkova trapiŭ małady čałaviek, jaki z-za palityčnaha pieraśledu źjechaŭ ź Biełarusi. Z dapamohaj Viber jon abzvońvaŭ biełaruskija adździeły milicyi, dziejučy jak prankier. U pryvatnaści, u UUS Homielskaha abłvykankama jon telefanavaŭ, kab paviedamić milicyi pra zaloty ŭ rehijon rasijskich dronaŭ.
Zatym adbyłosia niečakanaje: Viber-akaŭnt spačatku na karotki čas apynuŭsia ŭ hrupie «Šašłyki». Potym — u čacie «Sajuz śpiecyjalistaŭ».
U pierapiskach milicyjaniery Homielskaj vobłaści vykładali nie tolki materyjały pra kradziažy, ale i dakumienty, jakija datyčacca spravazdač pa pracy z «darmajedami», pra «supraćdziejańnie ekstremizmu».
Takim čynam vyśvietliłasia, što navat supracoŭniki kryminalnaha vyšuku vymušanyja zajmacca biespracoŭnymi, «niezaniatymi ŭ ekanomicy».
Supracoŭnikam nahadvali, u jaki čas treba zdać spravazdačy. Tak, dziakujučy čatu, «ekstremist» aznajomiŭsia z unutranaj kuchniaj milicyi.
Pavodle jaho słoŭ, jaho ŭraziła toje, što mnohija siłaviki ŭ telefonnych razmovach prajavili siabie jak «vatniki» i «saŭki». U čacie niekatoryja pastavili na avatarki savieckuju simvoliku.
Prykładna praź miesiac dostup da čatu prapaŭ.