«Kazachstanski kvartał» i novabudoŭli ŭ Čyžoŭcy, Masiukoŭščynie, Łošycy. Jak budzie zabudoŭvacca Minsk
U stalicy naličvajecca 25 maštabnych placovak zabudovy, pra heta ŭ efiry prahramy «Havoryć i pakazvaje Minsk» raskazaŭ hienieralny dyrektar abjadnańnia «Minskbud» Alaksandr Cierachaŭ, paviedamlajuć Minsk-naviny.
Tak pavinien vyhladać «Kazachstanski kvartał»
— Biezumoŭna, Minsk raźvivajecca. Zadača na 2025 hod vyznačana — uźvieści zvyš 700 tys. kv. m žylla, — udakładniŭ A. Cierachaŭ. — Kali havaryć pra maštabnyja plamy zabudovy, to ŭ Minsku ich bolš za 25. Akramia horada-spadarožnika Smalevičaŭ i žyłoha rajona Sokał, budaŭnictva budzie vieścisia ŭ Čyžoŭcy, Masiukoŭščynie, Łošycy i nie tolki. Praciahnie raźvivacca Soniečny.
Viadoma, uzvodzicca i kamiercyjnaje žyllo. Naprykład, realizujecca inviestycyjny prajekt małapaviarchovaj zabudovy ŭzdoŭž vuł. Parnikovaj. Tam raźmieściacca try taunchausy, krychu bolš za sotniu indyvidualnych damoŭ.
— Raboty ŭžo pačaty, praktyčna zavieršana prakładka inžynierna-transpartnaj infrastruktury, prystupili da budaŭnictva pieršych budynkaŭ. Realizoŭvać žyllo płanujem praz aŭkcyjony, a taunchausy — pa pryncypie dolevaha budaŭnictva. Praduhledžvajecca, što ŭ 2026 hodzie hetaja placoŭka budzie całkam zabudavana, uklučajučy ŭsie nieabchodnyja atrybuty: asfaltavaje pakryćcio, prajezdy, tratuary, liŭniovuju kanalizacyju, aśviatleńnie. Usio budzie jak u horadzie, ale maksimalna nabližana da pryrody, — patłumačyŭ hiendyrektar «Minskbud».
Jašče adzin cikavy prajekt — «Kazachstanski kvartał». Jon vyraście na miescy vytvorčaj terytoryi ŭ rajonie vulic Čyhunačnaj — Dubravinskaj — Hrušaŭskaj — Pramoj.
— Tam praviedzieny znos budynkaŭ i zbudavańniaŭ, ciapier viadziecca padrychtoŭka terytoryi, — dadaŭ A. Cierachaŭ. — Damy buduć uźviedzieny ŭ sieryjach MAPIDa. Ich admietnaj rysaj stanie kałarytnaje afarbavańnie fasadu. Žyllo pieravažna pryznačana dla tych, chto maje patrebu.