U Minsku źjaviŭsia «Sad vieršaŭ» — litaraturny aazis dla ŭsioj siamji
U Minsku źjaviŭsia niezvyčajny park z paetyčnym nastrojem — «Sad vieršaŭ», dzie kultura sustrakajecca z pryrodaj, a alei pieratvarajucca ŭ staronki vieršaŭ. Novaja zona adpačynku znachodzicca ŭ Maskoŭskim rajonie stalicy i ŭžo zaraz pryciahvaje žycharoŭ i haściej horada svajoj atmaśfieraj i sensam, piša relax.by.
Što takoje «Sad vieršaŭ»?
Novaja łakacyja — heta nie prosta dobraŭparadkavany park. Heta litaraturna-kulturnaja prastora, u jakoj:
- stvarajuć utulnyja zony dla cichaha adpačynku;
- adkryvajuć paetyčnuju aleju ź bijahrafijami i radkami biełaruskich kłasikaŭ — Janki Kupały, Ałaizy Paškievič, Maksima Bahdanoviča i inšych;
- raźmiaščajuć art-łavački ŭ vyhladzie raskrytych knih;
- arhanična spałučajucca łandšaft i kultura.
Infrastruktura, jakaja ŭžo pracuje
Niahledziačy na toje, što budaŭnictva jašče praciahvajecca, na terytoryi parka ŭžo dastupnyja:
- prastornyja piešachodnyja darožki z azielanieńniem;
- dźvie dziciačyja placoŭki — dla małych i dla starejšych dzietak (z horkami, pierachodami, pieraškodami i piaskom);
- spartyŭnyja trenažory i pamp-trek dla aktyŭnaha adpačynku;
- zona vyhułu sabak;
- vuličnaja biblijateka — chaj pakul i biez knih, ale ź vialikim patencyjałam;
- cichija kutki z tematyčnymi łaŭkami i miescami dla piknikoŭ.
Architektura i zaduma
Aŭtar prajekta — Uładzisłaŭ Kaškoŭski, małady architektar i pieramožca Hran-pry konkursu «Minskaja źmiena — 2024». Jon prapanavaŭ ideju abjadnać pryrodny reljef z kulturnym kodam Biełarusi, zrabić park nie prosta pryhožym, a napoŭnienym sensam.
Dzie znajści?
Park raźmieščany ŭ miežach vulic Alibiehava, Lva Sapiehi, Janki Bryla i praśpiekta Dziaržynskaha. Jašče niadaŭna tut byli nieprachodnyja zaraśniki — zaraz ža vymaloŭvajecca adno z samych atmaśfiernych miescaŭ stalicy, napoŭnienaje litaraturaj, sensam i spakojem.